OUTAPI- Minista woukashike kookanhu nonghalo nawa yokaana Emma Kantema okwa ti epangelo ota li kwashipaleke okukalekapo eameno lounona opo vaha ninge oihakanwa yomahepeko omomaumbo. 

Edi minista okwe di popya onghela kefiku ledimbuluko lokaana okAafrica la li kofikola Canisianum Roman Catholica High School kOutapi. 

Ovanafikola va dja keefikola dayooloka okwa li va holoka momwaalu muhapu okudimbuluka efiku lavo. 

Ovanafikola okwa li tava imbi nokudana oinyandwa ve udite etumba eshi ve li mefiku lavo. 

Kantema okwa ti ouministeli waye otau ka tula moilonga eepolongalama dokuyambidida ounona. 

“Ouministeli wange otau twikile okuyambidida ounona ve na ulema noshoyo eefiye noshimaliwa osho hashi di kepangelo,” ta ti. 

Okwa ti ovanafikola ova fimana molwashi otava ka ninga ovanashilonga va yooloka novaleli vokomongula. 

Minista okwa ti ombelewa yaye oya didilika kombinga yonghalo yovanafikola va ninga oihakanwa yomahepeko omaumbo unene tuu oukadona tava kwatwa onghonga. 

Okwa ti ouministeli wavo otau twikile okukalekapo oufemba wounona. 

“Eameno lokaana ola fimana. Oshi li oshinakuwanifa shetu okukelela ounona va hapekwa,” ta ti. 

Okwa kumaida ovanafikola opo va fimaneka ovahongifikola novakulunhu komaumbo. 

“Li hongeni nondjungu opo mu pite noitwa iwa kexulilo lomudo. Osha fimana ngeenge oshilongo shina ovanhu va longwa,” ta ti. 

Moshipopiwa shaminista wehongo shaleshwa ponhele yaye komukulunhuwiliki wehongo moshitukulwa shaMusati, Paulus Kashiimbi okwa ti ouministeli wehongo ota kwashipaleke kutya ounona otava mono omhito yoku ya kofikola. 

“Natulongelenikumweokuxwaxwameka ounona va kale mofikola shaashi keshe okaana oke na oufemba wokuya kofikola,” ta ti. – fhamalwa@nepc.com.na