ONGWEDIVA – Omulumenhu weedula 40 e li omufita wongeleka yoshiveva okwa kwatwa po konima eshi vati a kengelela omukulupe weedula 81 shaashi e mu lombwela kutya ota dulu oku mu panga okaanghela.
Oshiningwanima osha ningwa omwedi wa dja ko omafiku 26-27 komukunda Onheleiwa moshitukulwa shaShana.
Otaku hokololwa kutya meumbo lomukulupe ohamu di omukainhu ou va dala okaana nomufita ou.
Eshi a pulwa kopolifi okwa dopa okuyandja ouyelele kutya ongeleka yaye oi li peni.
Omukulunhu koshikondo shokukonakona oimbuluma wopolifi moshitukulwa shaShana omupedukomufala Fredrik Ndjadila okwa koleka oshikumungu eshi.
Opolifi oya hokolola tai ti omulumenhu ou okwa kwatelwa keumbo laye polukanda Kandjengedi mOshakati Omaandaxa.
Otaku hokololwa kutya natango omulumenhu ou okwa hangika e na onghili yakula osho yo omalamba olushene, okompiuta, nomashina olusheno ashike okwa dopa okundja ouyelele kutya okwe i hanga peni.
Oinima aishe a hangika nayo oi li pongushu yoshimaliwa N$22 600.
Opolifi oya hokolola tai ti omulumenhu ou ohe liufana ta ti ye ondudu, ye natango omufita e na ongeleka vati yoshiveva i li mOkandjengedi ashike mboli oipupulu.
Umwe ha di meumbo omo okwa hokolola ta ti inakulu okwa monika oudu wokaanghela osho sha eta nokuli opo a kale a tetwa evele.
Okwa weda po ta ti paife okaanghela otai ende ya uka molutu alishe. Okwa yelifa ta ti mumwainakadona wambulavo ou ve na okaana nomufekelwa ou e li omufita okwe mu lombwela kutya oku na inakulu ta vele okaanghela.
“Okudja opo mumwamemekadona ova ninga omalongekido naye opo a dule okuya keumbo letu nelalakano lokupanga meekulu,” ta ti.
Otaku hokololwa kutya efiku lotete omulumenhu ou okwa ya keumbo lomukulupe a enda pamwe novalumenhu vane mwa kwatelwa omushingi wotuwa.
“Eshi va fika meumbo okwa pula meekulu opo a dje mo monduda yaye yokunangala ndele tava tameke okulafulula mo omalambo avali. Efiku olo nombete oya tutumbilwa pondje,” ta hokolola.
Otaku hokololwa kutya efiku tuu olo konima eshi omulumenhu a lafulula omalambo monduda yomukulupe okwe mu lombwela kutya okwa pumbwa okudipaa oikombo ivali.
“Meekulu okwe mu nyamukula kutya meumbo kamu na oikombo ya wana. Ashike omulumenhu ou okwa kala nokukondjifa meekulu kutya okwa pumbwa ohonde opo ei tile momalambo oo a lafulula shaashi monduda vati omu na eendemoni,” ta ti.
Vati okudja opo omukulupe okwa dimina ndele ta tumu ovanhu va ka dipae oikombo ivali ndele omufekelwa ou pamwe novalumenhu ovo kwa li a enda navo tava tile ohonde yoikombo momalambo.
“Ova lombwela meekulu kutya monduda ina nangala mo shaashi omu na eendemoni,” ta ti.
Omuneumbo okwa twikila ta hokolola ta ti konima yokafimbo omulumenhu ou okwa lombwela omukulupe kutya monduda yaye okwa hanga mo onghili koshi yombete.
“Oshoshili onghili nafye otwe i mona ashike katu shi ngeenge pamwe okwe ya nayo ndele ta lombwele meekulu oipupulu,” ta ti.
Otaku hokololwa kutya omulumenhu ou okwa shuna kOshakati ndele ta londeke ombelela yoikombo ivali osho yo onghili nayo okwe i twaalela keumbo laye.
Vati efiku olo omukulupe okwa pulwa a yandje N$200 komushingi wotuwa shaashi okwa pumbwa omahooli.
“Mongula eshi kwa sha natango omulumenhu okwa alukila keumbo letu pamwe tuu novalumenhu ovo. Ova etelela omandini avali ndele tava tile monduda yameekulu omeva,” ta ti.
Otaku hokololwa kutya omulumenhu ou okwa tameka okupula omukulupe kutya na yandje oipundi 40, oipeleki 20 osho yo N$3000 ngeenge okwa hala okuveluka.
“Okudjao po otwa mona kutya mboli omulumenhu ou ta kengelele meekulu. Otwa dengela opolifi fiyo omufita ou ta ifanwa nokukala a kwatwa po,”ta ti.
Okwa weda po ta ti kumwe ova futa omulumenhu ou oshimaliwa shi fiki N$650.
“Meekulu paife okwa tambulilwa moshipangelo molwashi okwa handuka eshi a kengelelwa komulumenhu,” ta ti.
Opolifi oya kumaida oshiwana opo shi kale sha kotokela ovafita voipupulu osho yo eendudu molwaashi paife ovanhu otava tulwa mokatoo.