Omuhongifikola a xulifila moshiponga shotuwa

Omuhongifikola a xulifila moshiponga shotuwa

Hilya Ndeshihafela Hifindaka weedula 33, omuhongifikola pofikola Ofifiya Combined School okwa xulifa eshi otuwa yaye ye lidenga mumwe nololi.

Oshiningwanima osha ningwa Olomakaya mondjila pokati kOnhuno nOshikango, kOmafo efimbo loufiku.

Ofikola Ofifiya Combined School oi li momukunda Ondobe moshitukulwa shaHangwena.

Omukulunhu koshikondo shokukona oimbuluma wopolifi moshitukulwa shaHangwena, Omupedukomufala Malanie Mburu okwa hokolola ta ti konima yoshiponga omushingi wololi omulumenhu weedula 36 okwa faduka po.

Okwa kwatwa po efiku olo konima eshi opolifi ya longela kumwe noshiwana.

Opolifi oya ti omulumenhu ota holoka nena momhangu yaHangwena.

Ota pangulilwa oshibofa shokushinga nouhasha nedipao lihe shi loshiningilawina.

Hifindaka opo a xulifila poshiponga opo.

Omukulunhufikola Ofifiya Combined School, Kalusu Nghihupundobe okwa tanga Hifindaka ongomuhongifikola kwa li e hole oilonga noku na oukumwe kofikola.

“Otwa kanifa omunambili, omukainhu kwa li e hole okulonga oilonga yaye pefimbo,” ta ti. 

Nghihupundobe okwa ti onghela ovanafikola okwa li va ila  eedjapo davo ashike okwa li va nyika oluhodi konima eshi va uda onghundana yefyo lomuhongifikola wavo.

Okwa ti omufita e li moshipundi shopendjela Filipus Haulufo okwa li a fika onghela pofikola okuyandja omatumbulo okuhekeleka ovanafikola.

Ovahongifikola pamwe naHifindaka ove mu hokolola tava ti okwa li omukainhu e hole omashendjo ehe na onghone nokuhole okulongela kumwe navakwao.

fhamalwa@nepc.com.na