ONGWEDIVA- Epangelo laAngola ola tumbaleka omukokolipresidende nakufya Sam Shafaishuna Nujoma eshi a pewa epapa molwokulonga nawa nokudana onghandangala ya kula okuyambidida Angola moule weedula 50. 

Epapa ola yandjwa pefimbo ledimbuluko leedula 50 demanguluko laAngola Omaandaxa. 

Omupresidente Netumbo Nandi- Ndaitwah okwa ti a kakalela po Namibia kefiku lokudimbuluka emanguluko laAngola. 

Okwa popya ta ti epapa e li ola fimana shaashi ota li ulike oukumwe nombili pokati kaNamibia naAngola. “Okudja pefimbo loita Namibia okwa kala ve na oukumwe muwa naAngola fiyo onena. 

Ohatu twikile okukala tuna oukumwe noishiindalongo yetu,” ta ti. 

Omupresidente okwa pandula epangelo laAngola molwokuyandja epapa e li kOmukokolipresidente Nujoma shaashi ota li yandje efimano ku ye nonande a xulifa. 

Nujoma okwa xulifa neudo momwedi Februali, oye kwa li Omupresidente wotete waNamibia okudja 1990 fiyo 2005 

Pefimbo a fika pokapale keedila kOndangwa, Etivali Nandi-Ndaitwah okwa hokolola ta ti efiku ledimbuluko lemanguluko laAngola ola enda nawa. “Oshivilo okwa li sha longekidwa nawa. 

Ovanhu okwa li va fewa novakwaita tava saluta. Okwa li nda hafa mo shili okukala pamwe navakwetu koAngola tava dimbuluka efiku lavo,” ta ti. Omupresidente okwa weda po ta ti efiku lokutyapula eendula 50 demanguluko laAngola okwa li la longekidwa nawa nokwa li ta li ulike ondjokonona ya kula koshilongo. 

“Ovanhu va dja koilongo ya yooloka nomeni loshilongo okwa li va holoka momwaalu muhapu okutyapula efiku lemanguluko,” ta ti. Okwa yelifa ta ti efiku ta li ulike oukumwe nombili pokati koilongo ei ivali. 

Nandi-Ndaitwah okwa kumaida Ovaanamibia opo va twikile okukala ve na oukumwe nombili noishiindalongo shaashi osha fimana. 

“Ovanhu va dja koishiindalongo ovamwameme ngaashi naana tu li novakwapata vetu momaumbo. Natu kaleni navo nombili nokulongela kumwe,” ta ti. 

fhamalwa@nepc.com.na