“Oya dhenga meme taye mu tuku anuwa oshikulupe oshimbudhi oshoka itashi popi oshili.. osha ehama ndje…”
Ngoka ogo omatumbulo gomulumentu ngoka ye pame nayina, nomwana-mati anuwa ya dhengwa kopolisi.
Otaku hokololwa omukulupe gwomimvo 86, no nomona gwomuluntu gwomimvo 47 oshowo omutekulu gwomulumentu (22) anuwa oya dhengwa noku tukwagulwa kaapolisi ya dhika nokangoma kokatokele oshowo ooshako dhoosuka megumbo.
Japhet Amakali ngoka omwana gwomukulupe okwa ti, ohaya dhungu okatokele megumbo ko kunwa, sho taya kokola epya lyawo ihe, ka keshi kokulanditha.
Ta ti ooshako dhoosuka dhoka dha adhika megumbo okwali ye dhi tutu kokandingosho kawo oshowo iinima yilwe, ya tila yiya kwe ko, oshoka oondingosho ohadhi teywa koombudhi ethimbo ndika. “Oye tu dhenga ka tu na shotwa ninga. Oya futitha ndje N$2000 mo wala inandi landitha oomalavu. Oya dhenga meme taye mu tuku anuwa oshikulupe oshimbudhi oshoka itashi popi oshili.. osha ehama ndje. Eho lyandje lyokolumoho olya zinda ngaashi ngeyi kandiweteko nawa,” Amakali ta ti ngaaka.
Okwa hokolola ta ti, oshiningwanima osha holoka Etine lyoshiwike sha zi ko, potundi 09h00 yongula. Aniwa okwa mono ashike egumbo lyawo lya kondekwa kaa polisi taya pula kutya ongoma oyi li peni. Pethimbo ndjoka Amakali okwa adhika kalelwa kekopi lyi na onathi ndyoka kwali ta nu opo a ka tsikile iilonga ye yokukola.
Amakali okwa ti ina ikala, ihe okwe ya ulikile okangoma mpoka ta ti okwe ya fatulile natango kutya okangoma oke mwene, ihe iha landitha nando. Ta ti oha dhungu ashike okatokele ke mu yeleka oshowo aanegumbo lye ngele pena ngoka a hala okunwa mo.
Okwa nyenyeta ta ti, a no oshike aapolisi ihaya pulakene etaya konakona ngele ope na uushili omanga inaya dhenga aantu? Tse inatu tanguna nayo ihe, otaya dhengagula ndje yo taya thindile ndje ehete ndili nwemo nokutila ndje okatokele kolutu. Omutekulu gwawo Fanuel Shivute okwa ti, sho a li ayi popepi naa polisi ta fatulula noku ya uvitha ko kutya inaya dhenga we hekulu, oshoka iha landitha okatokele, oya tameke wo oku mu dhenga noku mu tuka kutya ayehe megumbo oombudhi.
“Oosuka dhoka odha kala mo okuza sho oondingosho dha patele, ohatu landitha oosuuka kondingosho yetu no kwali tuna uutile tudhi thige kokamba. Ishewe hadho adhike dhili megumbo ihe iilandithomwa ayihe otwe yi tutila megumbo nayo omo yili,” Fanuel ta popi ngaaka.
Ta ti, ngoka a lopota oshinima shoka, ina popya oshili, ina mona maandjao ta mu zi omuntu a landa nenge e ya okunwa okatokele , ihe aanegumb owala. Ta ti ohaya dhungu ashike ngaashi haya dhungu ontaku. Omupehakuluntu gwopolisi moshitopolwa shaShikoto, Petrus Shigwedha okwa koleke kutya, megumbo moka omwa li mwa adhika ongoma yokatokele, no yali ya futithwa N$2000, ashike inaya dhengwa nande nande, kape na ngoka a nyengwa kolutu.
Oshwike sha zi ko natango aapolisi yeli yaali anuwa oya li ya dhenge omulumentu gwedhina Joshua Immanuel (22) positola tayi ithwanwa Woermann Brock mOshakati. Immanuel anuwa okwa li a tindilwa komukeeleli gwomaliko okuya meni lyositola.
“Omukeeleli gwomaliko sho a keelele ndje mositola okwali nda shuna kegumbo ndika tale omumwameme kadhona opo a lande sho kwali a tumu ndje. Omanga ndili pondje ngame te pula kutya oshike itaa ndi ethelwa mo meni, onda mono aapolisi yaali taya pula omulumentu ngoka kutya oshike,” Immanuel ta hokolola.
Ta ti ina uva sho omukeleli gwomaliko a lombwele aapolisi, okwa mono owala eli kohi yomankawa, sho ta pula kutya okwa ninga shike, aniwa otaya tukana ashike, yo taya ti na hinge omanga inaye mu dhenga natango.
Omukuluntu gwopolisi mOshana Commissioner Rauha Amwele, okwali aya mukula kutya ita vulu okukoleka oshinima shoka, oshoka ka li po, ye natango itaya vulu oku gwana po oshoka inapu patulula oshipotha.
“Okwali e na okupatulula oshipotha tango omanga inaya kiifo-kundaneki, opolisi otayi kwathele ashike uuna oshipotha sha patululwa, tse tatu tsla kutya oshike shi na okuningwa po sha ikolela kekotampango,”Amwele ta ti ngaaka.