Omuamerica omumwenyeki dingi Darren Watkins Jr omunamido 20 oo a shivika nawa noshilukadina IShowSpeed, osho a nambele onghela moNamibia konima eshi a li a ninga omafiku a tula Ovanamibia vahapu moshipilili ovo va ninga efimbo lile ve mu teelela.

Ovanamibia vahapu, unene ovalanduli vaye vokomalungula ova ninga efimbo lile ve li moshipilili konima eshi va li va uda kutya olweendo laWatkins ola li la kalekwa pokafimbo, molwaashi eembila daye dokupita peengaba da li inadi potokonoka nawa.

Watkins, oku li oshiima shakula mokapale kokumwenyeka ovanhu komalungula, novanhu vahapu unene ovanyasha ohava kala va tala kuye ongomukumo efiku nefiku.

Ovamwenyeki vakwao Ovanamibia onghela ova li ve ke lindubila kokapale komatukilo eedila kaHosea Kutako, omo mwa kwatelwa nominista yomauyelele nomakwatafano opaungoba Emma Theofelus, ve ke mu shakeneka, noku mu tambula moshilongo.

Ovanaimiba ava va ninga efimbo ve mu teelela ova kala nokuyandja omaliudo avo kombinga yaashi va hala Watkins e uye a mone ngeenge a fiki moNamibia.

Umwe womuvo a shivika nawa komalungula ong Cassie Jesicca okwa ti okwa hala e uye a telele po ombinga yaRuacana, ye a tale nghee ovanhu hava di meendudu ye talele yo eedjo edi di li ombinga oyo.

Vamwe moukoloma vokuyandja omaulido kepandja loFacebook ova yelifa kutya, ova hala a fike ye e uye a tale nokufaneka eedjo dakula moNamibia.

“Oinima ngaashi eendeina, omafuta, efuta lomeva omongwa, oshilandopangelo ashishe koonono omo mwa kwatelwa nee nhele edi dina eendjokonona dekondjelo manguluko loshilongo,” ta va ti.

Omanga vamwe ta ti, fye okwa li ashike twa hala e uye a lole okapana koSingle Quarters, ye ta ka enda moKatutura a tale nghee Ovanamibia vanyakwa mokudengela omalukalwa avo.

Fiyo opapa Watkins ina popya kutya moNamibia ota ka kala mo omafiku e fike peni, ashike eshi osho oshilongo oshi-17 ta talele po muAfrica, moilongo 20 oyo a faneka okutalela po menenedu.

taimihaihambo2000@gmail.com