Ominista yomauyelele nomakwatafano opaungoba Emma Theofelus okwa ti epangelo otali ka kala omutumba okutula po eendjidikila di na sha nokufutifa ava ve hole okushinda ovanhu komalungula.

Theofelus okwa ti omutumba oo tau ka tameka momafiku 02 Febuluali neudo, notau ka kala u na eenghundafana osho yo omilandu noilanduli ya pamha, i na sha noshikumungu eshi.

“Okushinda omunhu komalungula oshibofa, sho kashi li paveta ta ti,” Theofelus ta yelifa.

Okwa twikila kutya Ovanamibia vahapu ova kala nokutaalela omahepeko a yooloka ngeenge tashi ya pomalungula, omo nokuli vamwe hava kendabala nokulikufa eemwenyo shaashi kave shi apa tava dulu okukonga ekwafo.

“Omahepeko aa hatu popi oku li momikalo da yooloka. Omahepoko ongaashi omahepeko oukashikekookanhu, omadipayo nomafyo oipundjamene okudilila komalungula, okulinyaneka noku li fiya pomitenya, osho yo okushinda ovanhu momikalo da yooloka, osho yo ovanhu tava tula eenghalamwenyo dovanhu osho yo oiholekwa yavakwao pomitenya.

Theofelus okwa twikila kutya omilandu nomalangekido oshikumungu eshi oku li metifa, nova teelela ashike va tule aishe peenhele, opo ve di twale komutumba wopashiwana vo va dule okupewa eufo laxuuninwa, u dulwe okutulwa moilonga.

“Ovanamibia ova ninga efimbo lile va teelela oveta yoludi eli i tulwe moilonga shaashi vahapu ova kanifa shihapu meenghalamwenyo. Eehombo momaumbo oda teka, yo ombili nayo oya kana,” ta ti.

-taimihaihambo2000@gmail.com