ONGWEDIVA – Oradio yOmulunga oya imanga uukunikumwe nositola yaPep, nelalakano lyokuyambidhidha aalongwa mboka ya taalela onkalo ondhigu nenge kaaye na omizalo dhosikola moshitopolwa shaShikoto.
Aalongwa yokoosikola Omundunda Junior Primary oshowo Ondundu Primary oya li ya ningi aanelago sho ya yambidhidhwa nomizalo dhi ihwa po, ndhoka dha li dha kotha oshimaliwa shi thike N$20 000.
Omahangano ngoka oga li ga gandja omizalo ndhoka tango kaalongwa yamwe mboka ya tothwa mo kaalongi poosikola dhawo.
Omukuluntuwiliki gwoositola dhaPep moshitopolwa shaHangwena Dishena Johannes, okwa ti oya li ya yambidhidha ngaaka omolwonkalo yoluhepo moka tamu iyadha aalongwa oyendji.
“Kehe okanona Okanamibia oka pumbwa okukala ka nyanyukwa, opo ka vule okwiitula mo meyilongo lyako,” ta ti ngaaka.
Omunambelewa omukuluntu koRadio Omulunga Simon Mundandala okwa fatulula kutya oya yambidhidha ngaaka sho ya li ya ndhindhilike onkalo yuunona, unene pethimbo lyuutalala.
“Otwa kala nokukundana nkene aanona kaaye na omizalo dhosikola dhi ihwa pethimbo lyuutalala, oshoka itaya vulu okuzala iikutu yawo yopaumwene,” ta popi ngaaka.
Mundandala okwa popi kutya ohaya kwathele pamukalo ngoka kehe omumvo, nomumvo gwa yi oya li ya yambidhidha aalongwa 51 yokosikola Onaushe Combined moshitopolwa shaShana.
Monakuziwa, omahangano ngoka oga li wo ga yambidhidha wo aanasikola moshitopolwa shaShana moka ngoloneya Elia Irimari okwa li a pandula kwaashoka sha li sha longwa komahangano ngoka gaali, ta ti osha simana notashi ka dhana onkandangala moonkalamwenyo dhaanona mboka ya ningi aanelago.
“Shoka itashi ka lundulula ashike onkalo yaalongwa, ihe otashi ka yambidhidha wo aalongwa ya itule mo miilonga yawo yosikola,” ta ti ngaaka.
Ta gwedha po ta ti, aalongwa yamwe oya za momagumbo moka kaamu na iiyemo ya gwana, okuya gwanithila po ashihe taya pumbwa, ihe epangelo itali ka vula wo okugwanithapo iipumbiwa ayihe yaanona.
Ta ti, ndika efano ewaanawa, nkene omahangano ngaka gaali ga tsakaneke epangelo ondjilakati, oshoka itali vulu okugwanitha po oompumbwe dhaalongwa adhihe.
“Mbaka oyo aaleli yetu yokomongula, ihe opo ya gwanithe po omayithano gawo, ongele taya yambidhidhwa wo natango ya kale ye na omukumo monakuyiwa,” ta fatulula ngaaka
Irimari okwa li a kumagidha wo aalongwa ya ka tsikile okwiilonga opo ya pe aayambidhidhi yawo omukumo ya tsikile oku ya kwatha natango.
-vkaapanda@nepc.com.na