OSHAKATI – Omufita wongeleka yoshiveva oku li modolongo shaashi vati a kwata onghonga nokumitika omunafikola weedula 15.
Omulumenhu ou weedula 34 okwa kwatwa po omwedi wa dja ko keumbo laye kOshakati.
Okwa anyenwa omhito yokulifutila mo modolongo pefimbo a holoka momhangu yaShakati.
Oshibofa shaye osha undulilwa komafiku 20 Sepetemba 2024 nelalakano ku ningwe omakonakono e lixwa po.
Ongeleka ei oi li kolukanda Onawa mOngwediva.
Omukulunhu koshikondo shokukonakona oimbuluma wopolifi mOshana, omupedu Commissioner Fredrik Ndjadila okwa hokolola ta ti pastoli vati oha lombwele okaana kutya ote ka twala keumbo konima ngeenge ongeleka ya dimbuka.
Okwa hokolola ta ti omudo wa dja ko omulumenhu ou okwa shinga otuwa yaye a uka moixwa ndele ta kwatele okaana onghonga motuwa.
“Neudo natango momwedi Maalisa efimbo lokonguloshi natango omufita ou okwa kwata okaana onghonga lwoshikando oshitivali motuwa yaye,” ta hokolola.
Ndjadila okwa ti ouyelele owe uya kombada konima eshi okaana ka tameka okuulika omadidili eteelelo nokonima oka lombwela ovadali vako.
Omukainhu weedula 27, okwa hokolola ta ti naye okwa ninga oshihakanwa shokukwatwa onghonga komufita tuu ou momudo 2020 keumbo lomulumenhu ou.
Okwa lombwela Kundana ta ti oshiningwanima osha ningwa pefimbo kwa li e li oshilyo shongeleka yomufita ou.
“Pastoli okwa kala nokulombwe lange lwoikando ya yooloka kutya okwa hala oku ya naame mekwatafano lopaihole. Okwa ti ota hombolange po,” ta ti.
Omukainhu ou okwa hokolola ta ti konima eshi a longelwa omunyonena wopaixulo okwa ninga eteelelo. “Onda lombwela pastoli kutya ondi na eteelelo ashike okwa lombwela nge kutya eteelelo ka shi laye,” ta hokolola.
Okwa hokolola ta ti okudja opo okwa kufa mo eteelelo.
“Onda xulifa po ekwatafana letu nomulumenhu ou molwashi ka kwali ndi udite ombili eshi a kwata nge onghonga,” ta ti.
Ota ku hokololwa kutya pastoli ou oha nangala novakainhu vahapu womongeleka yaye.
Neudo koshitukulwa shaMusati, okwa lopotwa omufita wongeleka yoshiveva a kwatwa po shaashi vati a kwata onghonga ounona vofikola.
Ota ku hokololwa kutya ovanafikola okwa li ve li oilyo yongeleka yapastoli ou.
Omufita wongeleka yaElcin koshitukulwa shaMusati naye oku li modolongo konima eshi vati a kwata okakadona keedula 18 onghonga lwoikando ya yooloka.