Omulumentu gomimvo 46 ngoka e li omusita keithano, anuwa okwa dhengwagulwa nokutukagulwa kaanambelewa yendiki lyezulonkalo mOndangwa, sha ningwa mehuliloshiwike lya zi ko.
Ornesto Mwapopyange okwa patululila oshipotha aapolisi yondholongo mboka anuwa ye mu ponokele noku mu dhengagula kee shi shoka anuwa a yona.
Mwapopyange ta ti ye mwene okwa li a panga oomvula ndatu mondholongo moka, nokwa kala ha ka ilopota ko palombwelo lyompangu.
“Onda li nda monika ondjo omolwedhipago kaali shi lyoshiningilawina, nokwa li nda pewa omimvo hamano mondjedhililo. Onda li nda kala mo ashike oomvula ndatu, e tandi pitithwa mo,” ta hokolola ngaaka.
Ta ti, okwa kala hi ilopota konima yoomwedhi ndatu pOluno mOndangwa.
Ta gwedha po kutya oshoka ye omunangeshefa, okwa li a kutha onkatu opo a ka ninge omayindilo kOluno, opo aanandholongo ye mu yambidhidhe okuhelula ololi ye ndjoka yi na iitungitho, ye te ya futu shoka e na po.
“Shoka okwa Ii sha tindwa momasiku 14 gomwedhi nguka, nokwa li ndu uvu ko, eta ndi shuna kegumbo,” ta popi ngaaka.
Ta ti, esiku lya landula ko olya li esiku lye lyoku ilopota ngaashi he shi ningi shito.
“Omanga kwa li tandi kuthwa ehokololo nda kuutumba mokandunda kamwe, ondu uvu ashike omawi taga zi konima yandje taga ti, “offender, offender, thikama ila,” ta hokolola ngaaka.
Mwapopyange ta ti, aanambelwa mboka oya li ya tameke oku mu dhengagula, nokumutuka omanga taya thingonona omaako ge, ye ta tulwa miiketanga.
“Nonando kakwa li tandi vulu okupopya oshoka kandi shi shi kutya ote dhengelwa shike, oya kala taya dhengagula ndje, taya popi kutya oshike ndi na okukala tandi indile aanandholongo ya ka longele ndje omanga natango ngame ooffender,” ta hokolola.
Ta ti, shoka anuwa osho kwa li tashi mu dhengitha, nonando a kala ta gandja ombili, ihe ota mbukagulwa ashike. Ta pula kutya oshike e na okudhengwa, nongele oku na epuko kape na omilandu dhimwe tadhi vulu okulandulwa okukandula po uupyakadhi mboka, peha lyokudhengwa.
Ta ti, okwa li a patulula oshipotha mOndangwa Osoondaha ya zi ko.
Omukuluntu gwoondholongo nezulonkalo Raphael Hamunyela okwa koleka kutya oshinima shoka osha thika momakutsi ge, ta ti otaku ningwa omakonaakono.
“Ngele shoka ta hokolola oshoshili noshi li mondjila, aanambelewa oya ninga epuko, kasha li nando omondjila, okudhenga omuntu. Otu li metifa okukutha omahokololo agehe koombinga adhihe, opo omakonakono ga tameke,” Hamunyela ta popi ngaaka.
Ta ti, uuna omakonakono gapu opo ta vulu okuyamukula kutya oonkatu ndhini oshowo etokolo lyini ta li ka kuthwa, ihe mongaashingeyi ita vulu okugwedha po sha omolwomakonakono ngoka inaaga pwa. – vkaapanda@nepc.com.na