Omunongononi mokulesha onkalo yombepo Vilho Ndeunyema, okwa ti okwa tengenekwa Shiyenga shaNangombe yi ga dhenge nawa pevi moshiwike shika sigo Omandaaha goshiwike tashi ya miitopolwa yimwe yokonooli. 

Ndeunyema okwa ti omvula otayi tsikile okuloka nawa nonando itayi ka loka momahala agehe. 

Ta ti, okuza Etiyali omvula oye ga tilehi nawa, nopu na ompito onene yeyelu, unene komahala ngoka haga talama nale omeya uuna kwa lokwa unene. 

Onkene ota kumagidha aakalimo momahala moka ya kale uupathi. 

“Onkalo otayi ende tayi lunduluka yu uka kuuhwepo, osho wo kuuwanawa lela, ndjoka tayi gandja omukumo gomata,” ta ti ngaaka. 

Ta ti, iitopolwa yilwe moshilongo nayo oya tengenekwa tayi ka mona omata, nonando ya kala inaayi lokwa nawa omasiku ga piti. “Onda lopotelwa natango omata omashona miitopolwa yilwe yokuuziloninginino,” ta popi ngaaka. 

Ta kwashilipaleke kutya omvula otayi tsikile okuloka natango, onkene aanafaalama naya kale ye na omukumo. 

Oku za mehuliloshiwike, omvula oya loko nawa koshitopolwa shaShikoto. 

“Omikunda dhilwe odha mona omata gomvula nonando hago ngaa ngoka taga hokitha. Oshitopolwa shaHangwena osha tegelela okumona omata gomvula ogendji oshiwike shika,” ta fatulula ngaaka. 

Ta ti, omata natango oga dhenge ngaa kiitopolwa yilwe kuununginino woshilongo. 

Omunafaalama Aina Nangolo gwomomukunda Otuwala okwi indile aanafaalama aakwawo yomomapya ya yande okukala pookamba pethimbo ndika lyokulonga momapya. 

Okwa popi kutya okwa koneke aantu oyendji taya dhenge ashike omangandja omanga ye na okukala momapya taya longo iipalutha yawo, omanga omvula tayi loko nawa. 

Nangolo okwi i nd ile aal e l i yopamuthigululwakalo opo ku tulwe miilonga ompango ndjoka tayi thiminike oondingosho dhi kale dha pata pethimbo lyongula uuna aakwashigwana ye na okukala ye li momapya. 

Thomas Ashipala ngoka a hokolola kutya okwa simaneka iilonga yomepya naye okwa indile epangelo lyi shunithe oondando dhomauhoho pevi opo aakwashigwana ayehe ya vule okwiilandela omauhoho yo yi ilikolele iipalutha ya gwana okuza momapya gawo. 

“Ngele atuhe otu na omukumo nelandulathano miilonga yetu, otatu vulu okulonga sha gwana oku tu palutha nokukandula po ondjala,” ta popi ngaaka. 

Ta ti, otaya vulu okuhuma komeho ngele taya longitha ethimbo miinima yongushu nopethimbo lyoopala. 

– vkaapanda@nepc.com.na