ONGWEDIVA- Erastus Iipinge nedina la shiivifika nawa ‘Matadizo -The Master’ okwa ti naye okwa nhukila mondabo nokushika eengalo doKwaito odo di holike unene kovanyasha nodina etumwalaka ta li tungu oshiwana. Okwa ti opo ashike a tameke okuimba eengalo momudo 2023, onghee oku na omukumo wokuxuma komesho natango.
“Onda hala okulongifa omaano ounongo wange okuimba,” Matadizo ta ti.
Omunyasha ou okwa dalelwa komukunda Onkani moshitukulwa shaMusati, okwa ti oha kala e udite ombili ngeenge e li komesho yovanhu ta shiki eengalo.
“Okudja ashike kounona okwa li ndi hole okupwilikina eengalo doKwaito naashi osha eta opo ndi longife ounongo wange okuimba eengalo,” The master ta ti.
Okwa ti okwa shika ongalo yedina “Meme ta ti” omo ta ti kutya osha fimana ngeenge ovanyasha tava pwilikine oomeme vavo.
“Omakumaido oomeme vetu okwa fimana notaa tungu,” ta ti.
Ongalo ei oya nhuninwa ovanyasha shaashi otai yandje etumwalaka nghene oomeme tava dana onghandangala yokukumaida ovanyasha.
Okwa ti pefimbo kwali munini, okwa xwaxwamekwa kovashikingalo vakula moshilongo ngaashi Gazza, Young T wokOngha osho yo The Dogg oo paife heli ufana King Tee Dee.
“Ova kwafela nge unene noku twa nge omukumo opo ndi dule okukala hadi shiki eengalo nondjungu,” ta ti.
Matadizo okwa yelifa ta ti okwa kala alushe e hole okupwilikina eengalo davo fiyo naye ta kufa fo oshihopaenenwa shiwa osho vemu ulikila.
The master okwa ti okwa taalela omashongo oshimaliwa shokulongifa ngeenge ta pifa eengalo dipe.
“Oshiwana ngeenge sha hala okumwenyekwa koivilo yavo nashi shikwatafane naame kongodi yange 0814192257, opo ndi dule okufika diva,” ta ti.
Okwa kumaida ovanyasha ve li momaumbo opo va longife ounongo wavo shaashi osha fimana.