SWAKOPMUND – Oumbudi wovanhu oshinima shi vela, noha shi dulu oku piyaneeka omunhu fiyo alushe. Eli ehokololo laEmma Naoses* omukainhu oo a li a dalwa omulumenhu ashike okwa lundulula eshito eli ndele ta ningi omukainhu.
Noases, okwa li ta hokolola ehokololo laye mEtitatu e na enyeme moku hepaununa nghene kwali e li teekwa kofamili yaye omanga ali okaana kokamati, eshi kwa dimbululwa kutya yee mboli eshenge. Okwali a efiwa e li tekule yee mwene momapandaanda omo a shakeneka ohonda yaye yomulumenhu wOmuangola oo e mu vakela moAngola omo eke mu ninga omupika woixulo.
Noases okwali umwe wovapopi kefiku hali dimbulukiwa mounyuni li li omhinge noulingilingi welandifo lovanhu la li la tyapulilwa moSwakopmund.
Oheli omo eke li hanga oya tamena eshi ina a ninga ehoololo pokati ka ye (Noases) nofamili yaye oyo kwali ya dama meitavelo lOshikatoolika. Ina okwa li e na outile kutya ofamili yaye nookaume kaye ota ve mu tile ngahelipi eshi e na okaana kokashenge.
Noases ta ti okwe li hanga mepandaanda e na omido 12, konima eshi a kwatwa onghonga kuxe ou e mudala. Okwa li a tokola ngeno a ka kale naxe konima eshi e li teekwa ku ina. Manga e li mepandaanda omulumenhu ou weshenge okwa tokola opo a ye mongeshefa youmbwada, ta tameke oku landifa olutu laye moixulo.
“Moumbwada omo nda shakeneka naku landifa nge po, efimbo olo onda li ndi na omido 17. Nakulandifa nge ou okwa kengelela nge shaashi okwa li a itaveli fa nge kutya ye omulumenhu wange, e na omhepo iwa, noku hole nge. Ashike emboli okwa li ashike ta longifa nge eshi a mona kutya nghi na ekwafo lasha,” Noases oo a li a nyika oluhodi ta hokolola.
Noases, ta ti ohonda yaye oyo oya tameka ha i mu twala keepaati noyiindingili oko haku kala shike omashenge. Koivilo oko, eshenge eli ola kala hali fininikwa kohonda yalo opo li ye moixulo novalumenhu vamwe nande oli kale ina li hala, shaashi omu lumenhu oo oku shishi kutya Noases okwe li kolelela muye pashimaliwa.
“Oheli yoo vene-vene oya tameka efiku limwe eshi nda ya kopaati moNamibia oko nda pewa oingangamifi ndi he shi kutya osha enda ngahelipi. Onda li nda haluka eshi nda ka penduka monduda ili moLuanda, moAngola ndili ina ndi djala sha. Nghishi kutya koAngola onda ya ko ngahelipi.
“Ondali nda lombwelwa komulandifi wange kutya ame eshina laye loku mu ningila oshimaliwa shaashi ovalumenhu vahapu ova kala tave ya noku ya naame moixulo shi he li pahalo lange. Onda kala ashike ndi li monduda omo ndiIi hamunghele, novalumenhu vahapu ova kala tave ya voo tava i, tava nangala naame ngaashi va hala. Kanda li ndi na oikulya, kanda li ndi na oikutu ile ngoo nande ofilinga,” ta popi ye ta hekumuna.
Ta ti eshi oshe mu teya po neenghono shaashi naku mu ninga omupika wopaixulo, omulumenhu oo kwali e mu lombwela kutya oku mu hole.
Ta ti efiku limwe puye ope ke uya omuSamaria omunamutimanghenda oo e mu kwafela opo a mone ondjila yokufaduka po a dje mo monhele omo, noku mu tula mobesa oyo ha i shingwa oinano ile, pokati kaNamibia naAngola.
Eshi she mu udifa vali nai neenghono, osheshi ndalaiva wobesa oyo, ponhele yoku mu etela onghenda noku mu taulukifa eengaba, naye yoo okwe mu kwata onghonga ndele te mu umbu mo mobesa yaye, manga va li mondjila.
“Ashike onda ninga ngaho elao, ndele handi fiki moNamibia. Paife ondi li apa ndi popye ehokololo longhalamawenyo ya nge. Oshinima osho osha ningwa eedula 17 da kapita, ashike fiyo onena ngeenge handi hokolola ehokolola eli, oha ndi kala ndi udite kutya oipute yoshiningwanima osho natango oitalala. Ashike nonande nda pita moudjuu ufike opo, onde li tala ko onga ependa. Ame oluxupe, kandi shi oshihakanwa,” ta fatulula.
Noases oumwe womovanhu eemiliona mounyuni ovo va ninga oihakanwa yongeshefa ei hai di oshimaliwa sheebilona.
Omavalulo otaa ti oibofa yoludi lolo ili 35 oya li ya lopotelwa opolifi yaNamibian oku dja momudo 2010, oibofa ili 20 yomwaayo natango oi li meemhangu omanga i li 15 ya potokononwa nale. *Kali shi edina laye loshili. Naashi osha ningwa opo ku amenwe ounhu waye.