Hamushangadjai wehangano loNamibia Bus and Taxi Association (NABTA) Pendapala Nakathingo okwa ti otava ka kala omutumba naminista woyendifo opo va kundafane kombinga yondado yotaksi neembesa tai ka wedelwa. 

Meenghundafana a ninga naKundana onghela, Nakathingo ina popya kutya ondado yotaksi ile eebesa otai ka wedelwa naingapi. 

“Ohandi ka lombwelwa minista kombinga yondado yeelefa tadi ka wedelwa. Ngeenge minista okwa tu kumwe nondado oyo handi ke mu lombwela nena ondado oi na okuwedelwa,” ta ti. 

“Inandi popya kutya ondado yeelefa oya wedelwa ashike onda ti otai ka wedelwa ngeenge twa kundafana naminista,” ta ti. 

Okwa didilikwa ondado yomahooli ya wedelwa oshivike sha dja ko naashi osha eta opo ovashingi veelefa va nyenyete kutya ondado yotaxi neembesa oya pumbwa okuwedelwa. 

Thomas Sheefeni, ha shingi otaksi okwa ti oshikumungu shomahooli a wedelwa otashi shunifa oyuuyemo yavo pedu shaashi paife mopate itava mono vali oshimaliwa oshihapu. 

“Paife otwa fa ashike hatu longele omahooli shaashi oshimaliwa osho tashi futwa kovanhu ohatu shi longifa okumwefa eeetuwa detu omahooli,” ta ti. 

Nakathingo okwa yelifa ta ti ehangano lavo oli na oshisho noovene voulefa naashi osha eta opo li kufe onghatu li ka kundafane nouministeli. 

“Ngeenge otwa hange eudaneko letu nepangelo kombinga yondado ipe ohatu ka shivifila oshiwana pambelewa kutya ondado otai ka wedelwa na inga pi,” ta ti. 

Okwa kumaida ova shingi veelefa opo vaha ninge nande epuko lokufutifa ovatwalelwa oshimaliwa shihapu. 

Nakathingo okwa lombwela ova twalelwa opo va lopotele opolifi ngeenge tava futifwa oshimaliwa shihapu molwashi ngaho omushingi ota longifa oumbudi. 

“Omunhu na fute ashike ondado ei ya ufwa okutwa ndele haku pulwa oimaliwa ihapu,” ta ti. 

Ovanafikola otava nyenyeta tava ti ngeenge ondado yeelefa oya wedelwa otava ka mona oixuna shaashi itava ka wanifa okufuta ondado i li pombada. 

Lusia Nghifindwako hava fikola koshipudilo shoIUM okwa ti eshi shito nale otava nyengwa okufuta ondado yotaxi yoN$13-00 ngeenge oya wedelwa otava dengwa pomutima. 

Ovanafikola ofye unene hatu ka mona oixuna shaashi ihatu longo,”ta ti. 

-fhamalwa@nepc.com.na