Opolifi mexuliloshivike oya lopotelwa nokupatulula oibofa moiningwanima ya yooloka ngaashi omakwatonghonga, oulunga osho yo omafyo momikalo dayooloka. 

Omakwatongongha 

Opolifi oya lopotelwa oibofa yomakwatonghonga i li omuwoi. Imwe yomuyo omukainhu weedula 42 a tulwa moipandeko konima eshi a kwata omukainhu mukwao keenghono weedula 58 koAus. Shikwao omushamane weedulwa inadi tumbulwa a kwata okamonakadona keenghono keedula 17 kOmusati. Omulumenhu womukwashiwa waAngola weedula 17, naye okwa tulwa moipandeko kopolifi konima eshi a kwata omukainhu weedula inadi tumbulwa keenghono. Omufekelwa vati oku li omutonateli woimuna meumbo omu a kwatela omunhu keenghono. Moiningwanima ikwao ovafekelwa va yooloka ove livakela meenduda doihakanwa nokunangala navo keenghono, omanga vamwe va kwatelwa keenghono momaluxwa osho yo koikololo. 

Oulunga nomateyo omaumbo 

Manga ovakwashiwana va fiya po omaumbo ovo va ka tyapula Eepasa davo, ookalyamupombo navo ova li ve lipyakidila nokutalelapo omaumbo ovanhu. Opolifi oya lopotelwa oibofa i li 14 youlunga osho yo omateyo omaumbo. Moibofa ei, ihetatu yomuyo oyomaumbo a teywa meedoolopa da yooloka omanga iheyali yomuyo oulunga woimuna ikwao oulunga wokukufa omaliko ovanhu. 

Omafyo 

Oibofa yomafyo nayo oya li ya londa mexuliloshivike, nopolifi oya lopota oibofa ya koya po-10, omo mwa kwatelwa oiponga yoihauto, omahetekelo okulidipaya oshoy o omalimangelo. Moibofa ngaashi oiponga yoihauto omwa kwatelwa efyo loshilyo shomutumba wopashiwana James Uerikua oo a xulifa pamwe nokamonamati. Moibofa yomadipayo omwa lopotwa omulumenhu, omukalimo waWindhoek oo a dipaya okanona keedula nhee, oko ka li koshi yetonatelo lakahewa kaye kopaihole konima eshi va li tava tanguna. Natango mOshakati, omulumenhu weedula ina di tumbulwa okwa ponhokelwa kovakwashiwana vaShakati nokudengwa nopakoo oshoyo oimwati ina omakiya fiyo omefyo, konima eshi ali feekelelwa oulunga weteyo leumbo. -taimihaihambo2000@gmail.com