OKALONGO – Aalongi posikola Ondeipanda Primary kOkalongo moshitopolwa shaMusati otaya indile ya tulilwe po ondjila yongalama okuthika kosikola omanga omvula inayi tameka okuloka.

Aalongi otaya ti ethimbo lyomuloka olya fuma ko onkene oye na uumbanda oku ka taalela onkalo ndjoka yokutaaguluka omeya omale ethimbo ndyoka.

Omukuluntusikola posikola Ondeipanda Primary Onno Hamulungu okwa ti osikola yawo ohayi kala muupyakandhi ethimbo lyomvula.

“Otwa hala opate yongalama ndjoka tayi vulu oku tu thikitha posikola ethimbo lyomvula, oshoka ondjila yetu ohayi dhimwa po thilu komeya, shoka hashi tu thiminike tu taaguluke omeya omale nonando sha nika oshiponga,” ta ti ngaaka.

Ta ti, oosikola odhindji odha tulilwa po oondjila , ihe yo oya hupu ko.

Ta gwedha po kutya ohaya thigi oohauto dhawo komitunda opo ya vule okupita omeya , omanga aalongwa yamwe ihaya vulu okupita, shoka hashi ya thiminike wo okupata osikola.

Hamulungu okwa popi wo kutya osikola yawo natango oya taalela omaupyakadhi goongulu dhosikola.

“Katu na oongulu dha gwana  posikola yetu, aalongwa oye li mo ya thinana moongulu, omanga aalongi kaye na mpoka haya gongala oshoka katu na ombelewa. Okangulu ha ndi na okakololo ashike,” ta ti ngaaka.

Omulongi gumwe posikola mpoka okwa gandja wo omanyenyeto kutya ohaya mono iihuna ethimbo lyomvula.

“Ohashi kala oshihwepo ngele taku tamekwa okulongwa kuyele opo katu  kale tu na uupyakadhi wokupata osikola , yo aalongwa ya pitililwe po kiilongwa,” ta ti ngaaka.

Oosikola odhindji konooli ohadhi pata omolwomeya.

Shika ohashi patitha oosikola, naashoka ohashi longitha wo aalongi nuudhigu.

Onkambandhala okumona omukuluntu gwelongo moshitopolwa shaMusati Paulus Kashiimbi oya hulile muunyengwi sho li itaa yamukula ongodhi ye.

-vkaapanda@nepc.com.na