Ngaashi eedolopa dikwao, yaNgwediva nayo oya teelelika i ka wapeke nokuyeleka odoolopa nomalamba okele mafiku mafiku. Omupopiliko wodoolopa Ottlie Shingenge okwa ti oku yeleka odoolopa pefimbo loivilo yomatango manene oshi li omukalondjiikile.

“Eshi ohatu shi ningi ashike nelalakano lokudimbulukifa ovakalimo vomodoolopa kutya owu li pefimbo loivilo yomatango manene, oo omalamba nao ohaa yandje ngaho omwenyo, nomhepo inya kutya heeno shili otu li muDesemba,” ta ti. Okwa twikila kutya okondalaka yokutema omalamba ohai pewa ehangano lakula lomalusheno ledina Nored lo olo li na oshinakuwanifa shokutema omalamba aa. Nored vati okwa li ena omaimbo onhumba, oo a etifa, omalamba aha temwe pefimbo. Eedoolopa dikwao oda tema nale omalamba ado, nomapandavanda oku li taa yandje omwenyo osho yo omhepo ya Desemba nedimbuluko lokele mumwe. Omafeweko oludi eli ohaa kala a fimana shaashi ohaa yandje nokuulika exumokomesho leedoolopa. Ovatelelipo veedoolopa ava hava kala va dja kondje yoilongo natango tava telele po eedolopa edi, ohava kala va mbekulwa komalamba a tema momifolomo da yooloka. “Omalamba ohaa kala e li momifolomo da yooloka ngaashi oumuti vokele, oinamwenyo ya yooloka, ouleke osho yo Santa oo e shivike nawa nedina Father Christmas,” Shingenge ta ti. Okwa ti ota ka pandula Nored ngeenge okwa ka wanifa po oshinakuwanifa shaye, opo ovakalimo va tyapule okutala omalambo modoolopa taa ti wiliwili nawa, unene pefimbo loufiku.

-taimihaihambo2000@gmail.com