Hilma Nakanduungile 

EENHANA- Omugundjuka gwedhina Priskilla Nghikomenwa ngoka a yambukile momukunda Ohauwanga moshitopolwahogololo shaMundaungilo mOhangwena okwa kumagidha aagundjuka ooyakwawo mboka yaa na iilonga opo ya longithe uunongo mboka ye na, okwiimonena shomondjato yo ya vule okwiiyambidhidha, pehala lyokukala ya mwena.

Omunamimvo 30 Nghikomenwa ota ti, omutumba ethete, ishewe okwiinyangela pamukalo gwomondjila oshiwanawa noonkondo, okweelekanitha nokunyanga pamikalo ndhoka tadhi etele aanyanyamagulu oshiponga, ngaashi okuyaka.

Nghikomenwa ngoka ha gandja omadheulo gokuninga iilanda nosho wo uutenda womomakutsi ta longitha oombapila, okwa gandja ekumagidho ndika pethimbo a ningi  omadheulo mOkongo.

“Ngame mwene ondi na ohokwe yokunduluka iinima. Ayihe handi dheulile yakwetu inandi yi longwa komuntu, ihe onde yi itsu ashike mokukala ndi ipyakidhila niilonga yokomake,” Nghikomenwa ta yelitha.

Ta gwedha ko kutya okwa dheula aantu yomwaalu gwa kola miitopolwa ngaashi Ohangwena, Oshikoto nOshana.

“Omumvo gwa zi ko onda ka gandjele omadheulo kOmuthiya sho kwali taku dhimbulukiwa omithigululwakalo noonkuluhedhi. Yamwe po yomwaamboka nda dheula oya andjaganeke wo ontseyo ndjika kuyakwawo, nokomukalo nguka, aagundjuka oyendji otaya imonene po okashonanima koku iyambidhidha nako,” Nghikomenwa ta ti ngaaka.

Nonando ta dheula aagundjuka ooyakwawo, Nghikomenwa ota hokolola kutya kashi shi oshipu. Ota ti, moompito odhindji okwa tsakaneke eshongo  lyoshimaliwa shokulanda iipumbiwa yomadheulo nosho wo ompumbwe yehala mpoka ta dheulile aantu. 

“Haantu ayehe haye ya komadheulo haya kala ye na oshimaliwa. Poompito dhimwe omwenyo shampa gwe ende, ohandi iyadha tandi ya dheula koshali, molwalwashoka yamwe otaya lilile ndje kutya kaye na sha nandenande. Olundji onde ya lombwele ya pendje uuna ya toola, ihe aashona yomuyo haya galukile ndje. Oyendji shampa ya mono ontseyo, ihandi ya mono we,” Nghikomenwa ta hokolola ngaaka.

Ta gwedha ko ta ti, nonando ha pula ondando yontumba okudhewula aantu, iha pula naanaa ondando yi tya shoo, andola a mone po sha shomungunda, molwashoka konyala oyendji mboka ya hala omadheulo otaya nana nondatu.

“Kashi shi oshipu, ashike okashona hoka handi mono po oke vulithe owala. Oka ninga eyooloko monkalamwenyo yandje, nohashi pendje wo enyanyu sho nda ninga eyooloko moonkalamwenyo dhayakwetu,” Nghikomenwa ta ti ngaaka.

Ta indile kAasamria aanamutima henda opo ye mu yambidhidhe pashimaliwa nenge pamikalo dha yooloka, a vule okuhumitha ongeshefa ye komeho.

Lucia Nghishongele, gumwe gomwaamboka ya pewa omadheulo ota ti omaudheulo ya pewa otage mu kwatha noonkondo, molwashoka ngashingeyi ota vulu okukala ta ningi iilanda ye nokuyi landitha a mone po shomondjato.

Nghishongele ta tsu aagundjuka  ya nyangadhale.

“Omutumba ethete. Aagundjuka ooyakwetu ngele oya kala ya mwena, itashi ya kwatha sha. Naya kuthe ombinga minima mbyoka tayi vulu okuya etela po sha. Nande owu na onzapo yuulongelwe wontumba, ihe ino mona iilonga, oshihwepo wu konge shoka to vulu okunyangadhala nasho opo wi imonene po sha,”  Nghishongele ta kunkilile.