Taimi Haihambo
Ongwediva- Omukulunhu wopolifi moshitukulwa shaMusati Commissioner Ismael Basson, ota kunghilile ovakainhu aveshe ava veli humbata, naavo ve na ounona, opo vehe va dipaye vali ile ve va kupule shi.
“Ngeenge owe li hange wa kwatawa komadiladilo okudipaya okanona koye konga exungomwenyo managa pepi shaashi oku dipaa oshinima sha nyika oshiponga.
Eshi okwe shi tonga sha landula oshiningwanima omo munafikola weedula 18 womosekundofikola yaAshipila mondodo 11 moshitukulwa shaMusati, a dipaya okanona kaye. Otaku hokololwa omunafikola ou a dipaa okamonamati konima eshi e ka dalela momuhandjo wofikola, ndele teka xwele eetoileta mokanya osho sha eta opo ka xulife.
Okwa hokololwa kutya omufeekelwa konima eshi a pulumuna, okanona kaye okwe katonyena mokambidja kaye. Nokonima okwa holeka olutu lako moskopa. Ovanafikola vakwao ova didilika ekungu lohonde li li moundjuwo osho sha eya opo va shikule omashishilila ohonde fiyo omonduda yomunafikola oo. Ova lopota oshiningwanima eshi kovahongi vavo, ovo va shiivifila opolifi.
Basson okwa popya kutya mofikola kamali nande omunhu a didilika kutya okaana oko oke li humbata –okudja ngaho kovahongi fiyo okovanafikola vakwao.
Okwa wedapo kutya omefeekelwa okwa tulwa moipandeko nokwa twala koshipangelo sha Shikuku. Omufeekelwa okuli meembete, e li koshi yetonatelo lopolifi. Basson okwa wedapo kutya olutu lohanana olili mokila yaShikuku notali ka twalwa ko kila yopolifi koKahao opo likanonakonwe kutalike osheetifi shefyo.
Basson okwa kunghilila yoo ovalumenhu ovo ve hole okuya momilele noukadona, ndele tava yandje omateelelo nokonima tave li kale, opo veshi tule po.
“Oinima yoludi eli oyo hai etifa oiningwanima yatya ngaha. Ovadali nanye popyeni yoo nomaludalo eni, nyee tamu ninipike eembedi deni nomalaka ahonga shaashi nao otaa dulu okweetifa oinima yatya ngaha,” Basson tati