Ombelewa yOmuprimaminista oya pititha omushangwa kutya omumvo kehe otayi kala tayi gandja oshimaliwa shoomilliona N$5 dhokuyambidhidha oku landa uukwathithi womathimbo waal ongwa yaakiintu oshilongo ashihe. Omuprimaminista Elijah Ngurare okwa popi kutya ombelewa yawo opamwe nuuministeli wemona, otaya kala taya longekidha oomiliona ntano okuhwepopaleka onkalo yaanona mboka haya nyengwa okulanda uukwathihi womathimbo. “Epangelo olya yambidhidha ngaaka nelalakano lyokukwathela aalongwa ya vule ya kale moosikola osho wo okuhwepopaleka onkalo yawo,” ta ti ngaaka. Aalongwa posikola Don Bosco Primary moshitopolwa sha//Kharas oya ningi aanelago sho ya yambidhidhwa nuukwathithi womathimbo mehuliloshiwike. 

Oshitopolwa ashihe osha li sha pewa uukwathithi wu li 2 978. Eyambidhidho ndyoka olya li lya gandjwa esiku kwa li kwa tokolwa pambelewa kutya oosikola otadhi kala tadhi pewa uukwathithi  womathimbo oshilongo ashihe. 

Uukwathithi womathimbo ohau dhana onkandangala monkalamwenyo yaakiintu, unene mboka kaaye na aakwathi osho wo iiyemo yoku wu landa. Oyendji oya li ya thigi po oosikola omolwiiningwanima hayi holoka mosikola uuna omukiintu inaa zala uukwathithi, omanga e li pethimbo ndyoka. 

Omulongi goshilongwa shoLife Skills Nalitoke Sheepo posikola pEhenye Primary, ngoka a kala nokukambadhala okukonga omayindilo okuza komahangano ga yooloka okukwathela aalongwa mboka ya taalela onkalo ondhigu  okwa ti, okwa ndhindhilike kutya hakehe omulongwa ha mono omayambidhidho ngoka okuza kaakuluntu momagumbo. Ta fatulula ta ti, okumona omasiku oku na omashongo ga yooloka. 

“Okanona ke li methimbo ndyoka oka pumbwa ka kale ke na uukwathithi, opo ka vule okwiikwathela uuna ethimbo ndyoka lya thiki,” ta popi ngaaka. 

Sheepo okwa popi kutya sho osho shoka ha kambandhala okukonga omakwatho opo aalongwa ya yambindhindhwe yo ya kalekwe mosikola. “Okumona omasiku, oshitopolwa shuukwatya wolutu lwaakiintu nuushitwe,” ta popi ngaaka. Omulongi gumwe Saima Thomas okwa fatulula kutya onkayi yuututa mokati kaanona yosikola, ohai eta omaupyakadhi ogendji osho wo okulundulula oonkalamwenyo dhawo uuna inaaya silwa oshimpwiyu. 

“Uututa womathimbo ohau dhana onkandangala mokati kaanona yaakadhona, unene tuu okuyanda okwaathiga po oosikola uuna sha holoka omanga ye li mootundi nenge mokati kaantu,” ta ti ngaka. Ta kumagidha ta ti, egandjo lyuututa womathimbo nali kale onkalondjigilile nokusimanekwa moshilongo. 

-vkaapanda@nepc.co.na