Uuministeli womayambulepo goondoolopa niitopolwa yokuushayi owa pitike etengenekothaneko lyoomilliona N$69,7 lyomumvo 2022/2023, okupewa oombelelwa oonene dhoshitopolwa shaShana.
Etengenekothaneko ndyoka okwa li lya pitikwa oshiwike shika, noshimaliwa ku udha oshi thike poN$69 726 571. Oshimaliwa shoka otashi ka longithwa okuyambula po nokuhumitha komeho oshitopolwa Oshana. Omupopiliko melelo lyoshitopolwa shaShana Elly Ashikoto okwa ti, oshimaliwa sha thika poomiliona N$52 otashi ka gandjwa okuza kepangelo okupitila muuministeli womayambulepo goondoolopa niitopolwa yokuushayi.
“Uuministeli natango owa pitike oomiliona dh apita N$3,4, okulonga ooproyeka dhilwe, ndhoka tadhi ka yambula po nokuhwahwameka omidhingoloko dhokuushayi,” ta ti ngaaka.
Ta gwedha po kutya mooproyeka moka omwa kwatelwa oshimaliwa N$945 000 shokulonga momidhingoloko dhokuushayi ngaashi Eheke nUukwangula.
Uukwangula nEheke, omidhingoloko dhimwe dha tothwa mo momikwawo tadhi ka longwa nonando pe na dhilwe dhi na natango uupyakadhi wa faathana wa pumbwa okukandulwa po.
“Natango oomilliona N$2 otadhi ka longithwa okutunga uundjugo wokuushayi, okukaleka po uuyogoki,” ta popi ngaaka.
Ta ti, uundjugo otau ka tungilwa oshigwana momidhilongo dhokuushayi.
Ta fatulula kutya oshimaliwa shi thike N$423 077, natango otashi ka longithwa okuyambula po nokuyambidhidha ooproyeka dhokuushayi, opo dhi vule okuhuma komeho nokugandja wo iilonga moshigwana.
Ta ti, moshimaliwa moka natango otamu ka longithwa okuyambidhidha ooprogalama dha yooloka dhokuushayi.
“Oombelewa oonene dhoshitopolwa shaShana odha longekidha oshimaliwa shomilliona N$1, shoka tashi ka longa opate yokUukwangula kohi yehangano lyi na sha noondjila lyoRoad Authority (RA),” ta ti ngaaka. Oondjila odha taalela omashongo omanene, nodhi na aluhe okulongwa opo dhi kale dhi li monkalo yi li nawa, tayi vulu okulongithwa okuyanda omaupyakandhi ga gwedhwa po.
Ashikoto okwa gwedha ko kutya, oshitopolwa shaShana otashi ka longa nokugwanitha po ayihe mbyoka ya inekelelwa.
“Otatu ka longa nuudhiginini okugwanitha po oompumbwe dhoshigwana oshowo oku eta po shoka sha twa uvaneke,” ta ti ngaaka.
Uuministeli owa yambidhidha ngaaka, okugwanitha po iilonga yawo, yokuyambula po nokuhumitha komeho iitopolwa yokuushayi.
– vkaapanda@nepc.com.na