Opolisi yaNamibia oya pititha uuyelele kutya aantu ye li 99 oya kanitha oomwenyo dhawo miiponga yomoondjila okuza muJanuali nuumvo sigo omasiku 23 gomwedhi nguka. 

Omukuluntu gwopolisi koshikando shoondjila komufala Perus Swartz okwa ti, okuza Maalitsa okwa ningwa iiponga yi li 632 mbyoka ya ehameka aantu ye li 1 018. 

Swartz ota kumagidha oshigwana shi kale aluhe tashi hingi sha ikwatelela komandhindhililiko gomoondjia, sho tashi yanda okuhingilila. 

“Onda hala oshigwana shi kale shi na oshimpwiyu shomoondjila uuna tashi hingi, ihe hakwaanako nasha nokuhingilila,” ta kumagindha ngaaka. 

Ta ti, ethimbo ndika lyomvula aahingi oya pumbwa okuhinga nuukeka. 

Ondjayi yetanga lyopolisi Joseph Shikongo naye okwa kala nokukumagidha aahingi yiiyenditho kaaya hingilile, yo ya gwanithe po oomandhindhiliko gomoondjila. 

“Oshigwana nashi longithe nawa omandhindhiliko gomoondjila okuyanda iiponga,” ta kumagidha ngaaka. 

Shikongo okwa ti, opolisi yaNamibia oshilongo ashihe oya ilongekidha okukaleka po oompango onkene itaya ka pitika nando omuntu ta ka konda nenge ta ka yonagula oompango adhihe dha tulwa po.

Ehangano lyo-MVA Fund nalyo olya kumagidha oshigwana shi hinge nuukeka. 

Lya ti ondjila otayi longithwa kaantu ayehe, onkene oshinakugwanithwa shakehe gumwe, okugwanitha po omandhindhiliko gomoondjila nokuyanda iiponga yombaadhilila,’’ taya kumagidha ngaaka. 

Ehangano lyo-MVA, okupitila kepandja lyawo lyomalungula olya li wo lya shanga kutya uuna oshiponga sha holoka moondjila, kehe gumwe okwa manguluka okudhenga konomola yopolisi 10111 nenge MVA 9682. 

-vkaapanda@nepc.com.na