Oyendji ya kondokelwa komikunda komeya kiitopolwa yokonooli oya faalelwa iikulya nomayakulo galwe okuza oshiwike sha zi ko sho epangelo lya ningi onkambadhala okulongitha omadhakadhaka.
Omadhakadhaka otaga topola iikulya nomayakulo galwe miitopolwa ngaashi Oshana, Ohangwena, Kunene osho wo ombinga yimwe yaMusati.
Aakalimo oya hololola enyanyu nokupandula sho epangelo tali ya kondjele opo oshigwana shi mone omayakulo, nonando pe na uupyakadhi wokuthika kuyo.
Shagamandje Uushona gokomukunda Okoma okwa ti oya etelwa omayakulo agehe taya pumbwa ngaashi uuhaku osho wo iikulya yoshikukuta osho wo iimuna.
“Kashi shi oshipu okutukitha iinima mbika mombanda. Oshindji osha longithwa onkene otu shi okupandula epangelo sho lye tu ningile ayihe mbika,” ta pandula ngaaka.
Omunafaalama Simeon Petrus okwa ti, ota pandula sho iimuna ye ya yakulwa.
“Iimuna yandje oya kala ya kwatwa komukithi ihe kakwa li tandi vulu okukalanda omiti kondoolopa, ihe okadhakadhaka oke tu etele omiti noondohotola, otwa pandula lela,’’ ta pandula ngaaka.
Nonando oshigwana sha kala sha ikolelela muutemba woondongi, ngashiingeyi omeya oga ningi ogendji, onkene itau piti we.
Ngoloneya gwoshitopolwa shaShana Elia Irimali okwa ti omeya oga ninga ogendji noonkondo onkene aantu itaya vulu okuza ko, niihauto itayi piti.
“Oshigwana osha kondekelwa ko komeya. Onkene otwa yambidhidha nuuwato opo oshigwana shi thike komahala hoka ya pumbwa meendelelo,” ta ti ngaaka.
Irimari okwa ti, okuza oshiwike sha zi ko okadhadhaka oka kala nokututa iikulya taka andjaneke kaantu mboka inaya mona oshikukuta osho wo omayakulo galwe.
Ta ti, omeya natango oga patitha oosikola 10 moshitopolwa shaShana.
“Oosikola odha pata pakathimbo omolwegameno lyaanona opo kaaya taaguluke omeya oshoka omale unene,” ta ti ngaaka.
Ngoloneya ota kumagidha oshigwana shi kale kokule nomeya.
Ta ti, ota kumagidha wo mboka haya ka nwa omangandja koondingosho kaaya taaguluke omeya oshoka osha nika oshiponga.
“Otandi kumagidha wo aakuluntu ya gande aanona yaa dhane omeya yo kaaya taaguluke omeya oshoka ohaga faalele oomwenyo dhaantu,” ta ti ngaaka.
-vkaapanda@nepc.com.na