Elelo lyondoolopa lyaShakati ota li kumagidha aakalimo yawo opo yafute oondjo dhomeya gawo, okuyanda omeya gawo ga tetwe ko.
Mayola gwelelo lyondoolopa lyaShakati Leonard Hango okwa ti, oya ndhindhilike kutya oondjo odhindji odhi li kaanangeshefa oshowo komahangano gopapangelo.
“Otandi pandula oshigwana otashi kondjitha, unene aakulupe ohaya futu omeya gawo nonando haayehe, ohaya kambadhala. Uupyakadhi owu li maanangeshefa,” ta popi ngaaka.
Ta kumagidha ta ti, aakalimo naya fute oondjo dhomeya gawo, okukelela omeya gawo ga ye moondjo ndhoka itaya ka vula oku futa, go taga tetweko.
“Otatu kondjitha elelo lyondoolopa kaaliye moondjo, oshoka ngele olya kala noondjo odhindji omeya otaga tetwa ko kuNamwater, shoka tashi ka tula ondoolopa ayihe muupyakandhi,” ta popi ngaaka.
Hango okwa ti, aakalimo naya futile omayakulo gawo, naya kale yena esiloshimpwiyu lyokufuta omayakulo gawo.
“Ngaaka oshafa ta tu, gandja omeya oshali shamuhongi omanga hatu galanda,” ta ti ngaaka.
Mayola okwa ti, omeya oga ningwa ombiliha opo ga vulike ku kehe gumwe okufutwa.
Okwa tothamo kutya oondjo adhihe kumwe dhomeya sigo ompaka odha thikama poshimaliwa shoomilliona N$3.
Omupopiliko gwelelo lyondoolopa yaShakati Katarina Kamari okwa ti, otaya gandja ashike sigo omasiku 08 gaApilili numvo opo kehe ngoka ena oondjo dhomeya a kale edhi futa.
“Kehe ngoka itaaka gwanitha po eindilo ndyoka, elelo lyondoolopa ota li ka kutha onkatu ya hugunina, yoku tetako omeya,” ta popi ngaaka.
Ta ti, shoka okwa li yeshi etapo konima ya dhidhilike kutya aantu oyendji oyena oondjo dhomeya.
“Aantu inaya hala okufuta omeya, netompelo kaa tuli shi. Otwa ningi ethimbo ta tu tseyithile noku kumagidha aakalimo yafute omeya gawo, ihe ihaye shi ningi,” Kamari ta ti ngaaka.
Ta fatulula kutya, oshikonga sho kupata omeya gaakalimo ayehe mOshakati, mwa kwatelwa oongeshefa nomahangano gepangelo otashi ka tameka momasiku 11 gaApilili numvo.
Ta gwedha po ta ti, mboka itaaya vulu okufuta pethimbo limwe, omolwa oondjo odhindji otaya kapewa ompito yoku shaina nkene taya kafuta oondjo dhoka.
“Ngoka a hala okutula po etso kumwe nelelo lyondoolopa kutya otaka futa oondjo dhe dhomeya ngiini, no muule wethimbo lithike peni, nathike poombelewa dhelelo lyondoolopa, omanga omasiku ngoka inaaga thika” ta kumagidha ngaaka.
Meya gwondoolopa yaShakati Leonard Hango . Ethano: Nampa