Omupopiliko wopolifi moshitukulwa shaHangwena Warrant Andreas Nghiyolwa okwa kumaida oshiwana opo shiha kwate vali eeshi oufiku momatale molwaashi osha nyika oshiponga. 

Nghiyolwa okwa ti opolifi oya didilika ovanhu moshikandjohoololo shaNdola nEngela hava kwata eeshi momatale oufiku osho tashi dulu okweeta omunhu a wile metale. 

“Omatale amwe ohaa kala e na omalambo a fewa a fa eendungu,” ta ti. 

Okwa ti nonande ovanhu tava dengwa komukaa, okukwata eeshi oufiku momatale kashi fi etokolo lomondjila. 

Okwa lombwela oovene vomikunda opo va longele kumwe noshiwana okulopotela opolifi ngeenge tava kwata eeshi oufiku. 

Omwedi wa dja ko koshitukulwa shaHangwena okwa kwatwa ongudu yovalumenhu eshi kwa li tava kwata eeshi vehe na epitikilo. 

Opolifi oya hokolola tai ti eeshi metale oda tulwa mo kouministeli wounamapya, omeva, omatulululo omadu osho yo eedjo domefuta. 

Otaku hokololwa kutya ovalumenhu ove livakela metale ndele tava kwata eeshi pamukalo woumbudi. 

Opolifi oya hokolola tai ti omulumenhu keshe okwa pewa ehandukilo lokufuta oshimaliwa N$2 800 ile a kale modolongo. 

Opolifi oya yelifa tai ti ngeenge eeshi tadi kwatwa momatale tete oshiwana ohashi shivifilwa opo shi holoke okukwata eeshi pamwe novanambelewa va dja koshikondo sheeshi. 

Oshiwana osha kumaidwa opo shi xulife po okukwata eeshi momatale inashi pewa epitikilo molwaashi oshi li kondje yoveta. 

-fhamalwa@nepc.com.na