ONDANGWA – Nelson Ndakevondjo okwa nangekwa pambelewa ongomubiisofi wongeleka yoReformed Evangelical Anglican Church Namibia (Reach) Osoondaxa sha dja ko kOndangwa.
Mopaife ngaha ongeleka yoReach Namibia oi na ovabiisofi vavali mwa kwatelwa omuwilikibiisofi Lukas Katenda.
Ovaleli vopapolitika ngaashi omupilimaminista woshilongo Elijah Ngurare nosho yo omuleli wongudu yomhilameno yo-IPC Dr Itula Panduleni Mbango, Omupresidente wo-AR Job Amupanda, ovaleli vakwao vopapolitika, ovafita okudja komaongalo a yooloka nosho yo ovakwaneongalo okwa li va holoka momuvalu munene.
Ndakevondjo oye umwe omovabiisofi omunyasheelela moshilongo ashishe, e na ashike omido 35.
Penangeko laye, Ndakevondjo okwa ti ota ka longa noudiinini nokuyakula nawa oshiwana pehe na omunhu ta ningilwa okatongo.
“Onga ndi li omubiisofi ohandi ka kwashipaleka oukumwe nombili mongeleka yetu,” ta ti.
Ta ti ota twikile okulonga oilonga yaKalunga nokuyandja ehongo lombiibeli koshiwana
“Ondi udite etumba okukala omubiisofi okutameka keedula dounyasha. Eshi osha dja kehalo laKalunga,” ta ti.
Okwa hokolola ta ti okwa putuka nainakulu komukunda Enghandja oo kwa li e li omukwatelikomesho woshinaaowa shongeleka yaElcin pomukunda wavo.
“Onda kala alushe handi i kongeleka nameekulu. Alushe okwa li handi kala nda humbata omambo okongeleka ndi li ponho yameekulu fye hatu imbi,” ta ti.
Okwa ti omudo oo okwa li e na eedula 12.
Ndakevondjo okwa ti inakulu okwe mu lombwela kutya ngeenge okwa xulifa oye ta kufa po oshinakuwanifa shokuwilika oshinaagoga shavo.
“Meekulu eshi a ka xulifa. Tatekulu Jeremia Mhanda ou va kala tava wilike oshinaagoga nameekulu okwa popya meefya ta ti nandi twikile opo meekulu a xulila,” ta ti.
Okwa ti okwa kala nokutwa omukumo kovakulunhu kutya na twikile okulonga oilonga iwa oyo kwa li tai longwa kuinakulu.
“Onda ya keumbo lovadali vange shaashi meekulu ou ta tekula nge okwa xulifa. Onda twikila nokulongela Kalunga ngaashi okukala meengudulwiimbo dongeleka,” ta ti.