Auleria Wakudumo 

Ouministeli wouhaku nonghalonawa owa tameka oshikonga shokuwapaleka oipangelo noupangelo vashona oshilongo ashishe. 

Minista wouhaku, Dr Esperance Luvindao okwa holola kutya oshikonga eshi otashi ka tulwa moilonga koitukulwa aishe moshilongo. 

Oshikonga otashi kala nokuningwa meemwedi nhatu keshe. 

“Eshi otashi ningwa okukwashilipaleka kutya oipangelo osho yo oupangelo vashona moshilongo ova kwatela po oukoshoki noundjolowele opo tu kale tu na onhele yovanaudu va yela,” Luvindao ta ti. 

Minista okwa li a kwatela komesho oshikonga shokuwapaleka pamwe novanambelewa vakula mouministeli wouhaku meembonge dakula douministeli moWindhoek. 

“Ngaashi omupopi a tile, ino ka wapaleka komaumbo omanga meumbo leni mwa kaka, osho sha kufifa ouministeli momutumba. Itatu dulu okuvelukila moipangelo ya kaka,” Minista ta ti ngaho. 

Luvindao okwa holola yo kutya ouministeli owa kala nokudidilika omanyenyeto kovakwashiwana molwoipangelo ya kaka noundjolowele wayo. 

Luvindao okwa ti otava ka kwashilipaleka kutya ovakulunhu voipangelo aishe otava ka katukilwa onghatu moshinima eshi. 

Aveshe otava ka teelelwa va unganeke okuwapaleka oipangelo yavo eemwedi nhatu keshe. 

Ouministeli owa holola kutya itau ke lididimikila keshe ou ina hala okulandula omulandu ou shaashi inau. 

“ Itatu ka teelela ovakwashiwana va wapaleke ngeenge nafye itatu shi ningi sheevene. Atushe natu kufe ko oshinakuwanifwa shokuwapaleka osheshi eshi osho ashike tashi tu twala komesho onga ovanambelewa voundjolowele,” Minista ta ti. 

Luvindao okwa holola olupandu kwaaveshe ovo va kufa ombinga mokuwapaleka ombelewa youministeli. 

-wakudumoauleria@gmail. com