Auleria Wakudumo 

Opolifi oya didilika omwaalu woibofa i na sha noingangamifi ya li ihapu unene mexuliloshivike omo ovafekelwa mwa kwatelwa ovakainhu va tulwa moipandeko. 

Omupopiliko wopolifi, Deputy Commissioner Kauna Shikwambi okwa holola kutya opolifi oya tula ovanhu vahamano moipandeko eshi va hangika nepangwe. 

Umwe womwaavo va tulwa moipandeko omukainhu weedula 54 koAroab, oo a hangika noushako ve li 16 vepangwe osho yo eepela domandarax di na ongushu yoshimaliwa shi yoN$60. Omukainhu ou vati okwa li a humbata oingangamwifi oyo membaba lokutalaleka olo a hangika nalo. 

Oshiningwanima shikwao, omulumenhu weedula 24 okwa tulwa moipandeko eshi a hangika nepangwe pefimbo a li ta hadwa kopolifi. 

Oshiningwanima eshi osha ningilwa koPlaatjies Heuwel Koes, sha ningwa Etitano po17h00 fiyo opo 18h00 lwaapo. 

Shimwe vali, opolifi oya tula moipandeko omulumenhu weedula 29 eshi a li ta kendabala okupitifa epangwe omanga opolifi tai hande omapangwe. 

Eshi osha ningilwa Olomakaya moKeetmanshop, sha ningwa lwopo 14h30 lwaapo. 

Shikwao, omulumenhu weedula 35 osho yo mukwao weedula 37 ova tulwa moipandeko eshi va hangika noushako vomapangwe ve li vatano ve na eegrama 345 ve na ongushu yoshimaliwa shi fike poN$17 250. 

Opolifi oya holola kutya oya shivifilwa ovafekelwa kovakwashiwana ovalineekelwa mOranjemund novafekelwa ova tulwa moipandeko po21h50, Etitano. 

Oshiningwanima shikwao, opolifi oya tula moipandeko omulumenhu weedula 34 eshi a hangika nepangwe longushu ihe shiivike pefimbo opolifi ya li tai ningi omapekapeko epangwe. 

Oshiningwanima eshi osha ningilwa momukunda Mbambi moNcaute, sha ningwa po16h00 Olomakaya. 

-wakudumoauleria@gmail.com