Omulumenhu weedula 23 okwa kwatwa po konima eshi a denga omukainhu wohonda yaye neengonyo molwashi vati kwa li ta popi mongodi nomulumenhu umwe po.

Oshiningwanima eshi osha ningwa Etitatu molukanda Ondundu modoolopa yaPuwo efimbo lomutenya.

Omukulunhu koshikondo shokukonakona oimbuluma kopolifi yomoshitulwa shaKunene omupedukomufala Iiyambo Paavo okwa holola ta ti omufekelwa okwa nyeka ko oumbako vokomatwi vongodi yomukainhu shaashi okwa li a hala okuuda kutya ota popi na lyelye.

Okudja opo vati omufekelwa okwa tameka okudenga omukainhu neengonyo nomanghava moshipala.

Ota holoka momhangu nota pangulilwa oshibofa shomahepeko omomaumbo. Opolifi oya kumaida ovakainhu opo va kale tava lopota ovalumenhu vavo ngeenge tava ningilwa omahepeko momaumbo.

Oshiningwanima shikwao, omulumenhu 25 naye okwa kwatwa po konima eshi a twa kaume kaye nombele keendingosho.

Oshiningwanima osha ningilwa molukanda Okapupona modoolopa yaPuwo Etitatu efimbo lokomatango.

Otaku hokololwa kutya ovalumenhu ava okwa li tava ninwe pamwe nokudja opo ova tameka tava tanguna.

Nakuninga oshihakanwa weedula 20 vati oku na ekwatafano lopaihole nomukainhu womufekelwe.

Omakonakono opolifi otaa twikile moibofa aishe.

– fhamalwa@nepc.com.na