ONGWEDIVA - Oosikola moshitopolwa shaShana odha taalelwa keshongo lyompumbwe yomahala gokutaamba aanona moongundu dha yooloka. 

Ompumbwe ndjoka unene otayi oya taalela unene aanona mboka taya kongo oondondo pre-primary, ondondo yotango, ontihetatu oshowo ontimulongo.

Osikola oya tameke nena, ashike aavali mboka ye na aanona inaaya tambulwa oya tameke oku kongela aanona yawo oosikola okuza oshiwike shazi ko.

Omukuluntusikola posekundo sikola Gabriel Taapopi mOngwediva, Sakaria Eelu Etitano okwali ayeleke kutya osikola yawo oya mana nale okutaamba, omvo gwa ziko.

“Ongundu ontihetatu, ontimulongo oshowo ontimulongo nayimwe, omadhina oga pita mo nale, ihe oya tegelela ashike epitikilo okuza koombelewa oonene dhelongo opo ye ga tsilike,” ta popi ngaaka.

Ta ti, iizemo yondondo 12, opo ya zimo no yategelela natango omadhina okuza koombelewa onene.

Ta gwedha po ta ti, mboka taya kongo omahala gaanona omolwa omatompelo ga yooloka, otaya ka udhitha ompapila yi na uukwatya wawo, nongele pwa ka monika omahala, taye ya tseyithilwe mongodhi.

“Ina tu hala okudhengelwa ta tu pulwa, ihe naya tegelele tuya dhengele, no ngele inaya dhengelwa oko kutya inapu monika omahala,’’ ta popi ngaaka.

Oosikola odhindji moshitopola shaShana ndhoka ndhina oondondo okuza poshikunino odha yelitha etitano kutya itadhi vulu okutaamba aalongwa paife. 

“Oshiwike shika otwi ipyakandhila nokutula aalongwa moongundu mboka ya kala po nale posikola naamboka ya taambwa nale okuza omumvo gwa yi,” Amushanga posikola Ongwediva Control Combined, okwa li alombwele omuvali gumwe ngaaka.   

Ta ti, osikola ngele ya tameke nawa opo taya kala ye na uuyelele wothaathaa kutya oongundu dhini tadhi kala dhi na omahala. 

Omulongisikola gumwe inaahala endhina lye lyi tumbulwe okwa ti, oya taalela uupyakadhi woongundu ngaashi oshikunino, ondondo yimwe nontihetatu. 

“Oongulu dhetu ondhu udha, odhi na nale aanona taya zi koongundu dhokonima. Otwa taalela uupyakadhi notwa eta olukeno lwaamboka taya kongo oosikola moongundu ngaashi ndhoka,” ta ti ngaaka. 

Aavali okuza oshiwike sha ziko oya kala nokunyenyeta uupyakadhi wa taalela omataambo gosikola.  Yamwe otaya nyenyeta aanona yawo ya taambwa koosikola dhokokule, ihe inaya taambwa momihandjo. 

“Aanoona yetu otatu ya fala peni katu na iimaliwa yokufuta oohiila,’’ omuvali gumwe ta nyenyeta ngaaka.

Oosikola odhindji moshitopolwoa shaShana odha popi kutya oshiwike shika otaku ningwa omayalululo gaanona moosikola sigo Etitano.

“Omolwetompelo lyi li pombanda, otatu ka vula ashike okukwathela mokutaamba aanona konima yomayalulo,” osho oosikola dhimwe dha yamukula ngaaka. 

-vkaapanda@nepc.com.na