Dick naRonel Peter mboka ya li ya toto po ehangano lyokugamena oomwenyo dhaanona  noohanona  inaadhi halika kooyina, mo2018 tali ithanwa “Ruach Elohim” ko kutya omumvo gwaKalunga oya ti, nuumvo oya taamba mo aanona  ye li 20.

Aaholike mboka oya fatulula kutya uunona wu li utatu womuwo, okwali ye u dha mokambamba hoka ya tula kondje yegumbo lyawo moSwakopmund moshitopolwa shErongo.

Ehangano ndyoka oli li mekwatathano nuuministeli wuukawashikekookantu nuuthemba womuntu. “Ihatu taamba ashike uunona mboka inawu halika kooyina, ihe naanona mboka kaaye na omahala gokuza  oshowo ya taalela omahepeko momagumbo,” ya popi ngaaka.

Omukiintu ngoka okwa fatulula ta ti, oya ndhindhilike kutya okambamba hoka otaka kwathele oomeme haya ekelehi oohanana muundjugo nomomilamba, okuhupitha oomwenyo dhoohanana oshowo oonkalamwenyo dhawo. “Aakiintu oyendji otaya tsikile oku ekelahi oohanona nonando aluhe otaya londodhwa ye wu thige miikaha yaantu, oshoka  oye na uumbanda wokuningilwa omapulaapulo. Okambamba oke li megameno oshoka kape na ngoka te ku pula, nohanona ohayi kala megameno,” ta ti ngaaka.

Ta ti, aanona mboka ohaye ya sile oshimpwiyu  oshowo okuyapa ohole ayihe aanona ye na okumona. Ta gwedha po ta ti, aanona mboka ohaya vulu okwiilwa ko kaakuluntu yawo ethimbo kehe sha ikwatelela koompango nomilandu dhepangelo dhi li po. Okwa ti, ita vulu okugandja pethimbo ndika omwaalu gwaanona ye na ayehe kumwe okuza esiku ya toto po ehangano ndika, ashike ehangano ndika olya hupitha oomwenyo dhaanona oyendji. “Otu na oprogarama yokutalela po oomeme ya mona uunona, oku ya yambidhidha noompumbwe dhimwe oshowo oku ya kumagidha nkene ye na okukala noohanana dhawo,” a popi ngaaka. Ta ti, ohaya yakula oongodhi odhindji okuza koomeme ya ninga omategelelo inaaga longekidhwa, oku ya kumagidha nkene ye na okukutha etokolo lyahugunina, inaaya tula omwenyo gwokanona moshiponga.

Kehe ngoka e na ehalo lyokuyambidhidha nakehe shoka e na po, nenge e na uupyakadhi woludhi ndoka moNamibia alihe, oya manguluka okudhenga konomola 081 2426 396.

Selma Nangolo gwomolukanda Oneshila ngoka a li a ningi oomvula ntano modholongo, sho a li a ikutha epunda lyoomwedhi hamano, e ta fumbike ohanona okwati, ota ipe oombedhi.

“Omadhilaadhilo ohaga kala ogendji, ihe Saatana ohaga kambadhala okusindana. Okanona kandje paife ngeno oka koka, ihe onde ka dhipaga po. Ondi na ondjo,” ta popi neyeme.

Nangolo ta ti, okwa li a kutha mo epunda, sho a li a thigwa po kuhe yokanona, ta ti, okwa li e wete kutya ehulilo lyuuyuni.

“Kakwa li ndi shi ngele otashi ka falandje sigo okomeho yompangu, nonando uupyakadhi kwa li nda taalela okwali tawu vulu okukandulwapo,” ta ti ngaaka. Ta kumagidha aakiintu ta ti okanona okakwawo nayina, onkene simanekeni oomwenyo dhaanona yeni, nonando owukale walyata kombanda yekala lyomulilo.