ONGWEDIVA- Ouministeli wounamapya, omeva nomatulululo omadu otau ka tunga eemboola domeva 39 moshitukulwa shaShikoto neudo.

Eemboola ota di ka tungwa moikandjohoololo ngaashi Okankolo, Eengodi naNehale lya Mpingana molwashi oyo unene ya didilikwa ku na enota. Edi oda kolekwa komunambelewa omukulunhu wounamapya mOshikoto Steven Taukondjele.

Taukondjele okwa lombwela Kundana onghela ta ti epangelo ota li lalakanene okukandula po omukundu womeva nokwashipaleka kutya oshiwana ota shinu omeva a yela. Okwa didilikwa ovakwashiwana koikandjohoololo ngaashi Eengodi, Okankolo naNehale lya Mpingana hava teke momifima omanga vamwe ohava ende oshinano shile tava ka teka keembola. Ovanafikola, ovahongifikola keefikola noshoyo koupangelo otava dengwa kenota molwomhumbwe yomeva ashike omafimbo amwe epangelo oha li twala eendoloma domeva keefikola ndele ina di wana.

Epangelo ola ninga eenghendadala dokutunga eemboola domeva ashike odi na omeva malula, onghee iha dulu vali okunuwa koshiwana. Onghee Taukondjele okwa ti eemboola tadi ka tungwa ota di ka eta ouwa koshiwana molwashi itashi ka enda vali eendjiladiledile tashi konga omeva komatambi okokule. “Oovene vomikunda ova yandja nale eenhele opo ta pa tungwa eemboola. 

Onghee oshiwana na shi longele kumwe novanailonga tava tungu eembola vaha longela eembola ominyonena,” ta ti. Taukondjela okwa weda po ta ti eemboola ota di ka tungwa komahangano a tatu, onghee ombelewa yaye otai kwashipaleke kutya eemboola ota longwa pefimbo. Lwopokati opo, kansela woshikandjohoololo shaNehale lya Mpingana Joseph Shilongo okwa pandula epangelo eshi ta li tungu eemboola moshikandjohoololo shaye molwashi oshiwana noimuna itashi ka dengwa vali kenota. Okwa ti oshikandjohoololo shaye osha taalela yoo vali omashongo ngaashi eepate dii omakwatafano mai noshoyo oupangelo ina wana.

Onghee okwa indila eeministeli da yooloka unene tuu ouministeli woilonga neendjila opo u kandule po omukundu weepate dii. Kansela woshikandjohoololo shaKankolo Hansa Nambodi okwa ti ei oyo onghundana iwa koshiwana molwashi omudo wa djako oshiwana okwa li tashi kwena enota. “Ka kwa li shipu omudo wa djako. Oimuna novanhu oya dengwa kenota molwashi okwa li kuna oshikukuta,” ta ti. Ovakwashiwana vomukukunda Evale moshikandjohoololo Eengodi ova hokolola nehafo tava ti itava ka mona vali oixuna yokupita eengula va uka ketambi. “Alushe komifima oha kukala ku na omikweyo diledile dovanhu ve uya okuteka omeva. Otwa pandula epangelo letu eshi ta li ke tutungila eemboola opo tumwe omeva a yela,” Lovias Hangula omukalimo womukunda Evale ta ti.

-fhamalwa@nepc.com.na