ν Festus Hamalwa

Minista womangeshefelo Lucia Iipumbu okwa pula ovanangeshefa va shona opo va kwatafane nouminiteli okupewa omadeulo.

Edi minista Iipumbu okwe di popya pefimbo a ninga omutumba novanangeshefa va dja koshikandjohoololo Moses //Garoeb Olomakaya koWindhoek.

Okwa ti osha fimana ngeenge ovanangeshefa tava pewa omadeulo opo va kale vena ounongo wokuyambula po eengeshefa davo.

Minista pamwe nosheendo shovanambelewa va dja kouministeli waye ove li pyakidila okuninga omitumba novanangeshefa koitukulwa ya yooloka.

Elalakano okukundafana novanangeshefa kombinga yomashongo aa taalelwa noshoyo okutokulilafana omayele nghene ovanangeshefa tava yambididwa.

Iipumbu okwa lombwela ovanangeshefa ta ti ouministeli wavo otau lalakanene okuyambidida ovanangeshefa tashi pitile mokuyandja omadeulo.

“Ovanangeshefa va shona otava dana onghandangala ya kula okuyambula po eliko loshilongo,” ta ti.

Okwa kumaida oshiwana opo shi pule komesho nomaulikilo oipindi molwashi otaa etele ovanhu oyuuyemo.

“Osha fimana ngeenge omunhu ta landifa oilandifomwa yaye molwashi otashi lwifa ondjala noluhepo,” ta ti.

Okwa weda po ta ti ovanangeshefa otava shakeneke epangelo ondjilakati okueta po eemhito doilonga.

Iipumbu okwa ti okwa hala okumona eengeshefa tadi xumu komesho efiku keshe. 

“Oshiwana nashi longe nelitulemo okuhambula po eengeshefa davo diha teke po,” ta ti.

Okwa kumaida oshiwana opo shi kale tashi longifa ounongo okueta po oilandifomwa yavo vene ngaashi oihongomwa yoshiwambo noshoyo oikulya yoshiwambo.

“Onga Ovanamibia nafye otwa pumbwa okulonga oinima yetu ndele hatu landifa kovapashioni,” ta ti.

Okwa kumaida ovanyasha opo va kale tava kufa ombinga moinyangadalwa younamapya tashi pitile mokuninga oikunino yavo nokulandifa oikunomwa ya yooloka.

“Ka leni ta mu yambididafana. Ovanangeshefa nava topolafane omayelele nghene ve na okuhambula po eengeshefa davo,” ta ti.

Minista okwa popya ta ti ouministeli wavo itau ka yambidida ongeshefa  ngeenge  ina i ningilwa omapekapeko kovanambelewa va dja kouministeli wavo.

“Ouministeli otau ka ninga omapekapeko tete ngeenge omunhu ou a ninga omaindilo omashina oku na tuu ongeshefa shi li noshoyo okuningilwa omapulapulo kombinga ya shi ta ka longifa omashina,” ta ti.

Okwa ti oshiwana nashi shangife eengeshefa davo molwashi otashi kwafele ouministeli u ninge omalongekido omakwafo.

-fhamalwa@nepc.com.na