Lucas Tsamseb a shivika nawa Ilivari okwa anyenwa omhito yokulifutila modolongo konima eshi a holoka momhangu yaTsumeb onghela.

Oshibofa shaye osha undulilwa momudo tau ya momafiku 9 Januali omanga opolifi tai ningi omakonakono omoule.

Okamatyona aka paife oka holoka momhangu lwoikando ine konima eshi kwa li a kwatwa po omudo wa dja ko kOshivelo muDesemba shaashi a vaka ouwhiskey.

Ilivari ota tengenekwa e li pomido 20 nokwa shivika nawa okupitila komalungula eshi a kala e na ouvidio tau nyanyukifa oshiwana.

Opolifi oya hokolola tai ti Ilivari okwe liteyela melimba lopolifi omo hamu tulwa oinima ei hai kufwa ovanhu ngeenge va hangika noinima oyo inai pitikwa okupita peinda lopolifi pOshivelo.

Vati Ilivari okwa longifa oshitenda nokuteya omuvelo welimba, nokonima okwa kufa mo oipakete yomalodu ouwhiskey itatu. Opolifi oya hokolola tai ti oshiningwanima eshi osha ningwa mokati koufiku.

Okamatyona aka oka kala nokuholoka momhangu lwoikando ya yooloka ashike oibofa yaye ohai undulilwa komesho. 

Okamatyona aka Ilivari okwa li yoo vali ka kwatwa po momudo 2021 mekwatafano loshibofa shekwatonghonga omo kwa li tava fekelwa kutya okwa kwata omukainhu onghonga.

Okwa li a pewa e lifutile mo modolongo noshimaliwa N$2 000 konima eshi oshiwana she mu yambidida noshimaliwa shokulifutila mo modolongo.

Ilivari ou okwa li yoo vali a nyika ounghundi omudo wa dja ko omo kwa li a tambulilwa moshipangelo oule wemweedi nhee. 

fhamalwa@nepc.com.na