Aalongi naavali yaanona taya sikola koKing Kauluma Combined School moshitopolwa Oshikoto oya ti aanona yawo otaya nana nondatu, unene pethimbo ndika lyomakonaakono, oshoka osikola yawo kayi na iitaafula niipundi ya gwana.
Onkalo ndjika oya thiminika nokuli yamwe yomaalongi opo ya ninge omayindilo moshigwana opo shi yambidhidhe aalongwa posikola yawo ye li 91 mboka kaaye na iitafula yokunyolela.
“Aalongwa yetu ohaya nyolele kiipundi omanga ya tsa oongolo pevi, omanga yamwe haya nyolele komatundji gawo oshoka kape na iitaafula,” ta hokolola ngaaka.
Aanona yondondo ontintano oshowo ontine oyo unene ya taalela uupyakanhi mbuka.
“Otwa kala twa taalela uupyakadhi mbuka ethimbo ele, ihe pethimbo lyootundi okwa li ngaa oshihwepo oshoka okwa li hatu ya tula muungundu yo taya topola iitaafula,” gumwe gwomaalongi ta popi ngaaka.
Ta ti, oya kala haya gongaleke aalongwa muungundu, aalongwa yahamano mokangundu kamwe, ihe paife oshidhigu oshoka ethimbo lyekonakono.
“Pethimbo ndika kehe gumwe oku na okukala i ikalela, opo kaaya yakathane, noye na okukala ye li melandulathano momusholondondo, sha ikolela komadhina gawo’’ ta ti ngaaka.
Omulongi ta gwedha po kutya onkalo yokutala aalongwa taya mono iihuna, taya shangele komalutu gawo noye li omutumba pevi nenge ya tsa oongolo posamende ohayi uvitha nayi, unene pethimbo ndika lyuutalala.
Omulongiskola omukwao ota indile moshigwana, kukehe gumwe opo ya yambidhidhwe niitaafula, opo aanona ya vule okushanga nawa.
“Otu li lela mompumbwe notatu indile kehe ngoka ta ke tu yambidhidha eshi ninge nondjungu,’’ ta ti ngaka.
Omukuluntusikola gwosikola King Kauluma Combined Edward Akawa okwa li a koleke kutya ope na aalongwa haya nyolele kiitaafula oshowo komalutu gawo, ihe okwa ti ita vulu okuya muule wehokololo noshikundaneki.
“Oshili shoka tashi popiwa, ihe itandi vulu okuya muule washo, oshoka inatu pitikwa okupopya niikundaneki. Dhengela omukuluntu gwelongo moshitopolwa shetu,” ta ti ngaaka.
Omukuluntu gwelongo moshitopolwa shaShikoto Aletta Eises kakwa li ta vulu okutya ko sha koshinima shika oshoka pethimbo lyoshifokundaneki shika kwa li tashi ka nyanyangidhwa okwa li moshigongi.
- vkaapanda@nepc.com.na