Omupresidente Nangolo Mbumba okwa ti omalelo opamifyuululwakalo otaa dana onghadangala yakula moshiwana okukaleke po efimano lomifyuululwakalo.

Okwa ti omalelo opamifyuululwakalo okwa fimana molwaashi otaa yandje ehongo kombinga yeenghulunghedi koshiwana.

Edi Mbumba okwe di popya pefimbo a talela po omalelo opamifyuululwakalo atano koshitukulwa shaKavango East noKavango West Etitatu. Petameko okwa li a talela omalelo opamifyuululwakalo ahetatu monooli noshoyo omalelo opamifyuululwakalo koshitukulwa sha//Karas.

Okwa popya ta ti elalakano lokutalelapo okuuda omashongo a taalelwa komalelo opamifyuululwakalo noshoyo okutopolelafana omayelele nghene omalelo taa ka yambididwa.

Pefimbo lomutumba Omupresidente okwa ti ombelewa yaye otai twikile nokulongela kumwe nomalelo opamifyuululwakalo.

“Osha fimana ngeenge moshilongo mu na omalelo opamifyuululwakalo opo tu kaleke po efimano leenghulunghedi,” Mbumba ta ti.

Okwa hokolola ta ti omalelo opamifyuululwakalo nawo otaa dana onghadangala okukaleka po ombili noukumwe moshilongo.

“Twikileni okukaleka po ombili noukumwe komidingonoko deni shaashi ombili oya fimana moshilongo,” ta ti.

Okwa weda po ta ti ombelewa yaye otai twikile nokulongela kumwe neeministeli da yooloka okukwashipaleka eyandjaneko lomayakulo koshiwana. Mbumba okwa ti okwa didilika omashongo koitukulwa yaKavango ivali ngaashi okuhe na oupangelo va wana, omakwatafano ai noshoyo eepate, nosho tuu. -fhamalwa@nepc.com.na