Ehangano lyokugandja ombinzi, lyoNamibian Blood Transfusion Service (NamBTS), olya kumagidha oshigwana shi iyambe okugandja ombinzi, opo ku hupithwe oomwenyo dhaantu ye li miipangelo. 

Omuwiliki mehangano ndyoka Titus Shivute okwa popi kutya, oya ndhindhilike ombinzi ya shuna pevi moompungulilo dhehangano lyawo, shoka tashi kala uupyakadhi kwaamboka taya ka pumbwa okuyambidhidhwa nombinzi uuna ye yi pumbwa. 

“Opelesenda ashike yimwe yaantu hayi iyamba okugandja ombinzi momvula ayihe, ihe oshilongo osha pumbwa omaludhi goombinzi ga yooloka omumvo nguka,” ta ti ngaaka. Shivute ta kumagidha oshigwana ta ti, nashi kambadhale okuyambidhidha okwiiyamba ombinzi opo ku vule oku ka hupithwa oomwenyo dhaantu omumvo nguka. 

Ta ti, opo ombinzi ya pumbiwa yi gwane NamBTS okwa pumbwa okugongela ombinzi yi thike pooliitela 160 kehe esiku. 

“NamBTS okwa li a gwedha ko oopelesenta 9.5% mokugongela ombinzi momumvo 2023,’’ ta ti ngaaka. 

Ta popi ta ti, oshigwana nashi koneke kutya ombinzi ihayi etwa po, ihe ohayi zi momuntu e na omwenyo opo yi vule okulongithwa, onkene oshi na okuningwa okuza kesilohenda lyomuntu ye mwene. 

Shivute natango okwa popi kutya ombinzi ohayi pumbiwa kaanuumvu ya yooloka miipangelo, onkene ngele kayi po okuyambidhidha aantu mboka otashi ka eta omakanitho goomwenyo ogendji. 

“Otwa ndhindhilike kutya oyendji ohaya yambidhidha nokwiiyamba nombinzi pethimbo aashona, ihe ngele oya koko ihaye shi ningi we,’’ ta ti ngaaka. 

Ta gwedha po kutya otashi wapala ngele oshigwana tashi kala nokuyambidhidha, okwiiyamba ombinzi nando iikando yi li ine momvula. 

Ta ti, okwiiyamba kombinzi uupyakadhi uunene wa taalela ehangano lyoNamBTS, onkene otaya pandula mboka ya kala notaya tsikile oku shi ninga okukwathela mboka taya ka pumbwa ombinzi, uuna yeli muuwehame wa yooloka tau pula eyambidhidho ndyoka. 

Ombinzi oyu uthwa okugandjwa kaantu ye na omimvo okuza 16-65, ominute ashike 30. Ombinzi ohayi gandjwa poosenda dha yooloka moondoolopa ngaashi, Walvis Bay, Swakopmund, Outapi, Ondangwa oshowo Oshakati. 

Oshipangelo shOnandjokwe mOndangwa, ohela osha li sha gandja uukalata wokudhenga wo N$30 ku kehe ngoka a li iyamba okuga ombinzi. 

NamBTS okwa kumagidha wo omahangano ga yooloka moshilongo oshowo oomandiki opo ga kwatathane nayo ya vule okweeta omakwatho ngoka po pepi, opo aanilonga ya vule okwiiyamba ombinzi. vkaapanda@nepc.com.na