Omukulunhu koshikondo shokukonakona oimbuluma mOhangwena, omupedu Commissioner Zachariah Amakali okwa ti opolifi otai longo nondjungu okukala ya mona ouyelele moshikumungu shedipao lomuhongifikola Natanael ‘Thabo’ Nghihalwa weedula 39.

Nghihalwa okwa xulifa meumbo lavo Olomakaya efimbo loufiku eshi vati a yashwa kuwalye. “Fiyo opapa inatu mona omunhu e tu dengela ongodi ta yandje ouyelele kutya olyelye a dipaa omulumenhu ou,” Amakali ta ti.

Oshiningwanima osha ningwa meumbo lavo momukunda Oshikwiyu moshitukulwa shaHangwena.

Otaku hokololwa kutya Nghihalwa efiku olo okwa dja pondingosho yaye i li mOmungwelume opo e ke likoshe.

Okudja opo manga kwa li ta di kokalikoshelo okwa ponokelwa kovalumenhu vavali noku mu yasha lwoikando ya yooloka.

Ovafekelwa ova teta yoo vali otuwa yaNghihalwa nomakatana komalola.

Omuhongifikola ou meumbo okwa li e li mo namumwainamati pefimbo loshiningwanima.

Amakali okwa ti opolifi oye lipyakidila nokuninga omakonakono ashike kape na ouyelele.

Okwa yelifa ta ti fiyo opapa kape na omunhu ta fekelwa medipao laNghihalwa.

Okwa indila oshiwana opo shi yandje ouyelele kopolifi keshe i li popepi, onghee okwa ti omunhu ta ka yandja ouyelele okwa amenwa kopolifi.

fhamalwa@nepc.com.na