OSHAKATI- Omundohotola Helena Ndume oo pamwe nosheendo shaye hava tande ovanhu noku twikulula ovanhu ve na ounghundi womesho, otava i manga mefudo.
Oshivike eshi, ovanhu ve dule po600 ova mona epango lomesho koshipangelo shaShakati moule. Oshikonga eshi, shi kwetelwe komesho komundokotola womesho Dr Helena Ndume noshoyo eendokotola da yooloka da dja meni nokondje yoshilongo mOshakati osha kala mo omafiku a ne.
Ovakulupe ovo unene va holoka momwaalu muhapu okukonga ouhaku womesho.
Dr Ndume okwa ti nena olo efiku la xuninwa loshikonga shomesho shomomudo 2023 onghee otava ka twikila ashike momudo tau ya.
Okwa ti elalakano loshikonga okukwashipaleka kutya ovanhu ova pangwa omesho nokukala ve weteko nawa opo va dule okulonga oilonga yavo noupu.
“Ohandi udu nawa ngeenge omunhu e weteko unene tuu ovakulupe. Iha shi kala shiwa ngeenge omunhu e li mokati ka vakwao ndele ke wete ko,” Dr Ndume ta ti.
Dr Ndume okwa ti nonande oku li moshipundi shopondjel okwa ti ota twikile nokuyambidida oshiwana mokupanga omesho noshoyo okutopolafana ounongo waye neendokotola dikwao.
Omundokotola ou aye ponhele yaNdume noku li paife omukulunhu woshikonga shomesho Dr Van Der Merwe okwa ti oshikonga osha enda nawa novayambidida omwaalu wovanhu vahapu.
Okwa ti momudo tau ya otava ka tameka noshitukulwa shaShikoto moshipangelo shaNandjokwe.
Merwe okwa pefimbo shikonga ova didilika omashongo ngaashi omiti dihe mo moipangelo noshoyo oikwafifo ina i wana ashike osho ina shi va imba va teke omukumo woku ya kula oshiwana.
Ovakulupe va pangwa omesho ova hokolola tava ti ova pandula nenyanyu eshi a mona ouwa woku mona epango lomesho shaashi paife otava kakala tava longo oilonga yavo noupu.
Saara Simon weedula 60 a dile komukunda Ohandiwa moshitukulwa shaHangwena okwa hokolola ta ti okwa ninga eedula nee ehe weteko.
“Ka shipu okukala mokati ovanhu ndele kuva wete. Ohandi kala ndi udite nai ngeenge ndi li mongeleka mokati ka vakwetu tava imbi ndele ka ndi wetemo mehangano lomaimbilo,” ta ti.
Tatekulu Likius Ruben weedula 91 a dile kOkankolo okwa hokolola ta ti okwa kala ha mono oixuna pehe na omuyambididi woku mu twala koixwa ngeenge oushitwe tau fana.
“Onda ninga eedula nanho da twika omesho. Onghee paife onda pandula eendokotola eshi de li unganeka okutwikulula omesho etu,” ta ti.
fhamalwa@nepc.com.na