ETAYI- Omupedu minista wouministeli woilonga noyeendifo Veiko Nekundi okwa ti emanguluko laNamibia ita shiti ovanhu nava kondjele okuninga omashenge ile okulonga oinima youxwapindi.
Okwa ti okwa didilika ovanhu vamwe tava kondjele oku li ninga omashenge noshoyo okutuka ovanhu komalungula.
Edi Nekundi okwe di popya kefiku ledimbuluko leedula 34 demanguluko laNamibia la dimbulukiwa komukunda Etayi moshitukulwa shaMusati Olomakaya.
Oshiwana sha dja komikunda da yooloka moshikandjohoololo shaEtayi okwa li sha ngudumana pombelewa yakansela okudimbuluka efiku lemanguluko.
Oikandjohoololo ya yooloka koitukulwa oye li pyakidila nokudimbuluka efiku lemanguluko laNamibia nelalakano okuyandja efimaneko kovanhu va kufa ombinga pefimbo loita.
Nekundi okwa ti paife eshi Namibia a manguluka ovanhu vamwe otava kondjifafana oku li ninga omashenge.
“Otashi pukifa oshiwana. Osha puka ngeenge omunhu e li ninga eshenge shaashi itashi ulike efano liwa,” ta ti.
Okwa yelifa ti elalakano laNamibia lemanguluko ka shishi okuyandja epitiko kovanhu va longe oinima puka moshiwana.
Nekundi okwa ti emanguluko otashi ti ovanhu nava longe oilonga iwa oyo tai ulike efano liwa moshiwana nokukala ve na oukumwe nombili.
“Namibia okwa manguluka paife ashike ita shiti kutya ovanhu nava longe eshi va hala unene tuu okupikifa oshiwana. Namibia oshilongo shi na omilandu da pumbwa okufimanekwa,” ta ti.
Nekundi okwa kumaida oshiwana opo shi longe nelitulemo, okulongela kumwe mokukondjifa ondjala noluhepo.
Okwa popya ta ti ekondjelomanguluko ola pula eemwenyo dovanhu nokwa pula oshiwana opo shi fimaneke efiku lemanguluko laNamibia shaashi ola fimana mondjokonona yoshilongo.
“Paife Namibia oshilongo shi na ombili noukumwe molwashi paife osha manguluka,” ta ti.
Nekundi okwa ti epangelo ota li kwashipaleke okukalekapo ombili moshiwana molwashi Namibia oshilongo sha manguluka paife.
Omupedu minista okwa popya ta ti epangelo ola didilika oshiwana sha taalela omashongo ngaashi omeva, okuhe na oilonga noshoyo onghalo yoshikukuta.
“Epangelo ota li twikile okuyandjaneka omayakulo koshiwana tashi pitile keembelewa dookansela,” ta ti.