Festus Hamalwa

“Omwenyo wange hambelela omwene, ondi na olupandu nehafo linene osheshi ame omunelao eshi nda mona omhito yokufutilwa ofikola komufimanekwa Usko Nghaamwa.” 

Aa omatumbolo a popiwa kuBerta Jakobus omunafikola e li momhumbwe oo a futilwa ofikola kuNgoloneya mukulu woshitukulwa shaHangwena Usko Nghaamwa.  Jacob omunafikola a shanga ondodo onhi-12 momudo wa dja ko kosekondofikola yaMungwelumÅe moshitukulwa shaHangwena. Nonande okwa pita nawa ekonakono, e na oitwa i li 34, ondjodi yaye yokutwikila kounivesiti oya li ya twima shaashi ovakulunhu vaye ihava longo, no itava dulu oku mu kwafela. 

Nghaamwa koshiindingili sha li kosekundofikola Omungwelume oshivike eshi okwa udaneka okufuta elihongo laJakobus noshimaliwa shomwaalu N$47 000 keshe kodula, oule womido nhee. Okakadona aka oka tambulwa koshipupudilo shopombamba shaUnam, Hifikepunye Pohamba Campus mOngwediva take lihongele oulongi. 

“Iyaalo tatekulu Nghaamwa onda pandula unene kekwafo loye,” Jakobus ta ti. Omunafikola ou okwa udanekela taka longa noudinini ta ti ina hala nande okuhepifa oshimaliwa eshi tashi futu ofikola yaye.

Jacobus okwa yandja olupandu linene kovahongi vaye ngaashi vopofikola yaye ikulu pOmungwelume. 

“Ovanafikola vakwetu longeni noudiinini opo mu pite nawa ngaashi ame, ouwa ihau monika nakapala ka yela onghee lesheni nawa oilongwa yeni nyee tamu dulika kovalongi veni,” Jakobus ta tu vakwao omukumo.

Ngoloneya oo naye opo a li poshiindingili opo okwa ti ye ota kala alushe nokuyambidida elongo, nota ka tala unene tuu kounona ovo va dja momaumbo mu na oluhepo. 

Nghaamwa okwa shivikilwa nawa oilonga yaye yokuhelihola yee mwene eshi a kala ta longo moku wafela oshiwana okudja efimbo a li ngoloneya. Okwa kala ta yambidida omatungo nokuyandja oikulya moshiwana unene tuu oilya ta kufa momaanda aye mwene.