ONGWEDIVA - Ngoloneya mukulu woshitukulwa shaHangwena Usko Nghaamwa okwa ti ota twikile nokuyambidida oshikondo shehongo mwa kwatelwa ovanafikola ve li moluhepo.
Nghaamwa okwa yelifa ta ti ita xulifa po okuyambidida eefikola nonande pe na omipopyo kutya ota kongo okulukilwa eefikola moshilongo. Edi Nghaamwa okwe di popya pefimbo kwa li ta tambula ko mbushe waye wosekundofikola yaMungwelume oyo paife ya ninga Usko Nghaamwa Secondary School. Nghaamwa okwa kala nokuyadja oikwafifo ya yooloka pofikola opo okudja omudo 2017.
Ofikola yaMungwelume oya kala ya taalela omashongo a yooloka ngaashi okuhe na omuhandjofikola, eengulu dofikola inadi wana nosho tuu.
Ovanafikola pofikola opo ohava di momuhandjofikola paife konima eshi Nghaamwa e va tungila omuhandjofikola.
Pefimbo ta tambula ko mbushe waye, Nghaamwa okwa yandja oshimaliwa N$150 000 kofikola sha nuninwa okulandela ovanafikola obesa.
Okwa yandja yoo vali oshimaliwa N$150 000 sha nuninwa okulanda oikwafifo ya pumbiwa komuhandjofikola, nosho yo eekompiuta 20 da pewa ovanafikola.
“Elalakano lange okuyambidida oshikondo sheefikola di kale oikwafifo ya wana noshoyo okushakeneka epangelo ondjilakati. Ehongo ola fimana kokaana keshe Okanamibia onghee onda hala moshilongo mu kale mu na ounona va mona ehongo,” Nghaamwa ta ti.
Okwa weda po yoo vali ta ti oha futile ovanafikola ve li koipupudilo ya yooloka ovo ve li momhumbwe yoshimaliwa.
Okwa ti osha fimana ngeenge oshiwana tashi yambidida oshikondo shehongo unene tuu ovanafikola ve li moluhepo.
“Ame ohandi yambidida ehongo tashi di komutima wange. Ngeno okwa li inandi hala okuyambidida ehongo ngeno inandi shi ninga, onghee itandi teka omukumo nonande nandi popilwe mouwii,” Nghaamwa ta ti. Moshipopiwa shaye omukulunhuwiliki wehongo moshitukulwa shaHangwena, Isak Hamatwi okwa pandula Nghaamwa eshi ta twikile nokuyambidida eefikola mOhangwena.
“Otu na eefikola dihapu moshitukulwa shaHangwena da yambididwa kuNghaamwa, onghee eshi otashi tu ovanafikola omukumo ve lihonge nondjungu,” Hamatwi ta ti.
Omukulunhufikola wosekundofikola Usko Nghaamwa Secondary School, Goerge Nanghanda okwa ti oikwafifo ya pewa ofikola yaye otai ka eta oidjemo iwa kexulilo lomudo molwaashi ovanafikola otave ke lihonga nondjungu.
Okwa weda po ta ti ovanafikola otava ka longifa eekompiuta okukala tava ningi oinyangadalwa yoilongwa yavo nosho yo okuninga omapekapeko omauyelele a yooloka kombinga yoilongwa yavo.
Nanghanda okwa weda po ta ti obesa tai ka landwa otai twala ovanafikola ngeenge tava i koinyangadalwa yomaudano nosho yo kEtosha National Park ve ke lihonge omaludi oifitukuti.