Okamatyona keedula heyali oka fya eshi ka wila metale lomeva pefimbo kwa li tava yoo navakwao.
Oshiningwanima osha ningwa Etitatu komukunda Ombaalume moshitukulwa shaMusati efimbo lokomatango.
Nakufya okwa tongololwa oye Petrus Lungameni omukalimo womomukunda Ombaalume.
Omukulunhu koshikondo shokukonakona oimbuluma mopolifi mOmusati omupedukomufala Moses Simaho okwa hokolola ta ti Lungameni okwa li va ka tyava oikuni noumatyona vakwao - umwe oku na eedula heyali omanga umwe e na eedula hetatu.
Okudja opo vati oumatyona ova kundafana opo va ka yowe metale li li popepi. Manga tava yoo, Lungameni okwa ningina koshi yomeva noina dja ko vali.
Otaku hokololwa kutya vakwao ova ka shivifila ovakulunhu keumbo, novakulunhu ova dengela opolifi.
Simaho okwa hokolola ta ti okwa didilikwa ounona va ninga oihakanwa okuwila momavela omeva, omavela oikundu, momatale nomomifima noshoyo mokanaala.
Onghee okwa kumaida ovadali opo va xulife po okutula omavela omeva poluhayela noshoyo okufiya ounona momaumbo vehe na ovatonateli.
Okwa ti osha fimana opo ovadali va kaleke po eameno lounona vaha ninge oihakanwa yokufila momeva.
Okwa ti unene tuu pefimbo eli lodula nokulifa oimuna oshiwana nashi takamife ounona vaha danene omeva.
Okwa weda po ta ti oshiwana nashi kale alushe tashi taataa ounona ngeenge tava lifile popepi nomatale omeva.