OKATYALI - Okamatyona keedula nhee oka xupa moshiponga shomundilo eshi ka xwika po eumbo lavo alishe mwa kwatelwa ongadjo yeumbo.
Oshiningwanima eshi osha ningwa momukunda Oshikondiilongo moshitukulwa shaShana.
Otaku hokololwa okaana aka ke livakela kepata manga ovakulunhu vako vali va omba monduda yonhumba i li vati kokule nepata.
Vati okaana oka kufa oshikuni shomudilo ndele taka tomeke onduda imwe i li pepata.
Konima omundilo owe lihanena eenduda dikwao meumbo mwa kwatelwa ongadjo yalo oyo ya li ya dikwa noihati mwa kwatelwa neenduda.
Andreas Vilho umwe womovakwanedimo okwa hokolola kutya pefimbo loshiningwanima ovakulunhu ova hangika ve li konduda imwe i li kokule, nova kundwa ashike komwifi we lihanena eumbo.
Okwa twikila kutya eshi shinyematifa oshe shi kutya meumbo vati inamu hangika mu na omeva va dule okudima omundilo, doo eepomba odi li kokule. “Ovashiinda navo vati ohava di kokule, voo vahapu ove ya okufika omundilo wa mana okuhanauna po nale oinima aishe meumbo molwoshinano. Natango vahapu kakwa li tava dulu okweendelela shaashi ova li va humbata omavela oshoyo omandini omeva,” Andreas ta yelifa.
Okwa twikila yoo kutya ovaneumbo aveshe vaheyali kape na nande oumwe a fyaala po nasha. Omaufemba ahapu okwa pila meenduda, oikutu oshoyo oikulya. Okwa weda po yoo kutya vambulavo ova nangala pondje oufiku oo shaashi kave na apa tava endekele ouluvi.
Ohatu indile oshiwana apa tashi dulu okuvatela shi vatele kongodi 0813243672 shaashi ohatu mono oixuna.