Okakadona keedula 17 oka fya moshiponga shikumwifa, eshi ka lyatwa kotuwa pefimbo ka li vati ta kafaduka po shaashi ta ka tewatewa keembwa.
Oshiningwanima osha ningwa Etivali momukunda Ondobe moshitukulwa shaHangwena efimbo longula. Nakufya okwa tongolwa oye Victoria Nghiimbwasha a dile komukunda Omunyekadi. Omukulunhu koshikondo shokunakona oimbuluma yopolifi mOhangwena, omupedukomufala Zachariah Amakali okwa hokola ta ti okaana oka ponokelwa keembwa kwa li di li pomukunghulo wopate.
Okudja opo okaana oka faduka po ka uka mopate, okwa dja otuwa yepangelo youministeli wouhaku ndele tai ka lyatwa noku xulifila ponhele opo. Omushingi wotuwa omulumenhu weedula 41, onghee omakonakono opolifi otaa twikile. Oshiningwanima shikwao, omulumenhu weedula 50 okwa xulifa eshi a lyatwa kombakumbaku pefimbo kwa li e li omutumba keendingosho.
Oshiningwanima osha ningwa Etivali momukunda Okambebe moshitukulwa shaHangwena efimbo lomutenya. Nakufya okwa tongololwa oye Heita Festus omukalimo womomukunda Okambebe. Opolifi oya hokolola tai ti omushingi wombakumbaku omulumenhu weedula 26, okwa kwatwa po molwaashi okwa li ta shingi ehe na omukanda.
Lwopokati opo, ohanana yeemwedi nhatu oya xulifa omanga ina okwa monifwa oshiponga konima eshi va lyatwa kotuwa. Oshiningwanima osha ningwa Omaandaxa momukunda Okakwa moshitukulwa shaHangwena efimbo lokonguloshi. Okaana oka tongololwa oko Tunomwene Johannes.
-fhamalwa@nepc.com.na