ONGWEDIVA- Okamatyona keedula 19 oka monifwa oshiponga konima eshi a ka ponokelwa kovanhu 15 ndele ta dengwa neengonyo noimwati.
Oshingwanima osha ningwa momukunda Uuvudhiya moshitukulwa shaShana Osoondaxa.
Thomas Ndamonaelenga okwa hokolola ta ti okwa hangika ta ende nakaume kaye tava di keendingosho efimb loufiku nokudja opo okwa dja otuwa ya humbata ovalumenhu.
Okwa ti okudja opo ovalumenhu ova nuka mo motuwa noku mu denga ehe na eshi a ninga.
“Kaume kange ou kwa li ndi li naye okwa faduka po. Onda uda ashike ovanhu tava ti ame va hala okudenga,” ta hokolola.
Okwa ti okudja opo okwa shivifila omuhona waye mwene wohambo omo ta longelo nokonima okwa twalwa koshipangelo shaShikuku opo aka mone epango lopaunamiti.
“Onda monifwa oshiponga meemati noshoyo moshipala. Kandi undite ombili eshi nda dengwa ndi he na ondjo,” Ndamonalenga ta ti.
Okwa ti okwa patula oshibofa molwashi okwa hala okufutwa eshi a monifwa oshiponga.
Mwene wohambo ha mu longele nakuninga oshihakanwa okwa ti paife oku na owike molwashi omunahambo waye okwa dengwa onghee paife ita dulu vali okulonga oilonga idjuu.
Eshi a kwatafana naKundana, omulumenhu ou kwa li ta shingi otuwa ya umbata ovalumenhu tava fekelwa medengo laNdamonaelenga okwa hokolola ta ti nakuninga oshihakanwa ota popi oipupulu ina dengwa shi li.
Okwe li popila ta ti Ndamonaelenga okwa li ta ende nokaume kaye oo kwa li ta kongwa shaashi vati kwa li e va kela meumbo lavo.
“Ovalumenhu ova nukila ashike kaume kaNdamonaelenga nokonima okwa kufa ombele a hala okutwa ovalumenhu. Onghee okwa ti Ndamonaelenga okwe li denga po pefimbo kwa li ta faduka po,” ta hokolola.
Onghee okwa ti Ndamonaelenga okwa mona oshiponga eshi a punduka.