WINDHOEK – Yina yokanona koomvula ntano hoka ka li ka kwatwa po ombambyona kokinda koKhomasdal noka li konima ka kwatwa koonkondo mEtine okwa li a shaina ofooloma kutya nakuninga omuyonena ina pewa ombooloha nande nena. Omunamimvo 50 okwa li a holoka mompangu yaKatutura sha landula oshiningwanima shoka. Ota ka holoka miipotha iyali, ekwatonkonga nekwatombambyona.

Omupopiliko gwopolisi Kauna Shikwambi okwa ti omufekelwa  okwa li nale a longela ondholongo omolwa iipotha yedhipago nekwatonkonga, ta ti okwa li a zi mondholongo pwa pita oomvula mbali ngashingeyi. Okanona hoka itaaka vulu okutumbulwa kedhina, ethano lyako olya li lya yi omukungu nomalungula mEtine . Sho ka li ka kongwa oka li ka monika mEtine komatango. Yina yokanona ta ti nakufekelwa oku shiwike kofamili.

Yina yokanona ta ti mEtine omona gwomimvo 19 okwa li a ka ka tala mumwayina kosikola na ine mu adha ko. Okwa dhengele yina nahe e ya pule ngele oya ka tala ko okanona kosikola, noya li ye mu lombwele kutya ine shi ninga.Okanona oke na aamwayina ye li kosikola hoka noya li ya dhenge ya pule aakuluntu ngele oka ilwa ko nale.

“Omulongi okwa li a ti omulumentu gumwe okwa li e ka kutha po. Okwa li e ka ithana kedhina ee te ka pendula, okwa li ta nika omangandja,” yina yokanona ta ti.
“Onda pandula sho ke na omwenyo,” omukulukadhi ta ti ngaaka. Ta ti okamwana itaka shuna ko we we kosikola.

“Mekwathelo lyosocial media omulumentu nguka okwa li a monika molukanda nokanona hoka ka ka li nombindja nando okwa li ku na uutalala.

“Oshidhigu. Onda mana okulonga iilonga yandje nopolisi nangula otandi mu fala kehungomwenyo. Oshiwinayi shi twe shi ningilwa. Otu na okutaalela oshili,” yina yokanona ta ti. Ta ti ina ya natango kosikola a ka pule nawa kutya okanona  oka li ka ka talwa ko nomukalo guni.

Shikwambi ta ti aantu komalungula oya longa nuudhiginini. Ta kunkilile aalongi ya kwashilipaleke aantu mboka hay aka tala ko aanona . “Oto ka gandja okanona ngiini komuntu ku mu shi. Oshike ito dhengele omuvali kutya ope na omuntu a ila ko okanona ku mu shi,” Shikwambi ta ti.

Ta to aavali inaya inekela nando omuntu nando ofamili unene tuu ngele okanona okakadhona. Ta ti omiyalu otadhi ulike kutya aantu oyendji ohaya kwatwa onkonga kaantu ye ya shi nenge ya pamabathana.
Moshiningwanima shi ili, Shikwambi ta ti okanona koomvula ntano oka li ka kwatwa onkonga kOngahalulu moshikandjohgogololo shaKongo mOhangwenea.

Aafekelwa yatatu oya li ya ningilwa omapulaapulo, mwa kwatelwa nohonda ya yina yokanona. Omakonaakono otaga tsikile.

Ta ti kutya anuwa omufekelwa okwa adha okanona haka nuunona uukwawo wa lala megumbo. Okwa ithana okanona kedhina nokwa ithana e ka pe anuwa oombe. “Okwe mu kutha megumbo e te mu fala anuwa mepya moka e ke mu pa oombe. Okwe mu kwata koonkondo nokwe mu shuna kegumbo,” Shikwambi ta ti.