Ovanhu ve dulife 200 ova kanifa oshimaliwa shavo konima eshi vati va tulwa mokatoo komukainhu ha landifa eetuwa.
Otaku hokololwa kutya omukainhu ou oha tula eetuwa komalungula kepandja laye la shangwa edina VIV Motors-Vehicles.
Omukainhu ou vati okwa kala e na eengalashe mbali, imwe oi li moshilandopangelo Windhoek omanga imwe oi li mOmungadu waShiweda, hano oWalvis Bay. Ashike paife vati oda pata konima eshi a tula ovanhu mokatoo.
Ovanhu va ninga oihakanwa ove mu shakeneka komalangula fiyo tava i meenghundafana naye nokutuma oshimaliwa shavo.
Omukulunhu wehangano loMonica Gender Equality Human Rights and Social Justice Shaanika Nashilongo okwa ti ombelewa yaye oya etelwa omanyenyeto ovanhu ve dulife 200 va kanifa oshimaliwa shavo molwaashi va tulwa mokatoo komukainhu ou.
Ehangano loMonica Gender Equality Human Rights and Social Justice ohali kwafele okulwifwa omahepeko oukashikekokaanhu noshoyo omahepeko omomaumbo noumbudi.
Ehangano eli ola kwafela ovanhu vahapu va ninga oihakanwa yomahepeko omomaumbo noshoyo ovanhu tava tulwa mokatoo. Eshi a kwatafana naKundana omukainhu weedula 29, omupangi paifano, okwa hokolola ta ti okwa kanifa oshimaliwa sheeN$80 500 shaashi a kengelelwa komukainhu ou.
“Onde mu shakeneka kepandja lokomalungula omudo wa dja ko muJuni oko omukainhu ou ha tula eetuwa diwa nodi na ombilixa. Okudja opo onde mu dengela ongodi kutya onda hala otuwa yoJetta,” ta hokolola.
Okwa ti okudja opo okwa pulwa opo a tume etata londado yotuwa komavalulilo ombaanga yomukainhu ou.
“Okwa lombwela nge ta ti otashi kwata eemwedi nhatu opo otuwa yange i fike moshilongo molwaashi oha lande eetuwa kondje yoshilongo,”
Okwa ti omudo wa dja ko eshi eemwedi nhatu da pita okwa pula omukainhu ou kutya otuwa yaye otai fiki naini ashike okwe mu lombwele kutya na teelela.
“Okudja opo onda ka uda ouyelele kombinga yomukainhu ou vati ta kengelele ovanhu. Onda ka shakeneke ovanhu tava nyenyeta eshi va tulwa mokatoo komukainhu ou,” ta ti.
Omulumenhu umwe naye a kengelelwe, okwa weda po ta ti okwa kanifa oshimaliwa N$135 000 konima a tumina omukainhu ou. Omulumenhu ou okwa ti momudo 2022 okwa tumina omukainhu ou oshimaliwa sheeN$20 000 nelalakano lokufuta etata londado yoPolo a hala okulanda.
“Okudja opo onda kala handi tumine omukainhu ou oshimaliwa opo ndi mane okufuta otuwa yange fiyo handi wanifa N$135 000 ashike okwa ti otuwa otai fiki ngeenge nda wanifa po oshimalilwa,” ta hokolola. Okwa ti okudja opo omukainhu ou okwa dima eengodi daye mbali nokufaduka po a uka kondje yoshilongo.
Okwa weda po ta ti nepandja lokomalungula oko kwa li ha tula eetuwa ola kufwa ko paife komukainhu ou.
Lwopokati opo, omukainhu umwe naye a ninga oshihakanwa okwa hokolola ti omudo wa dja ko momafiku 23 Novomba ova shangela ombapila kombelewa yomukulunhu wopolifi moshitukulwa shaKhomas tava pula omukainhu a kale a kwatwa po. “Otwa hala omukainhu a fute oshimaliwa shetu. Opolifi nai kwate po omukainhu diva shaashi okwa longifa oumbudi,” ta ti.
Omukulunhu woshikondo shokukonakona oimbuluma wopolifi moshitukulwa shaKhomas Omupedukomufala James Nandapo okwa ti ombelewa yaye oya lopotelwa kombinga yoshikumungu eshi.
Onghee oshibofa shi na sha noumbudi wekengelelo lovanhu osha patululwa koshitaasi shopolifi kOtjomuise nomakonakono opolifi otaa twikile.
Kundana okwa ninga onghendabala yokudengela omukainhu ou vati a tula ovanhu mokatoo ashike eengodi daye oda dima.