OSHAKATI - Opolisi moshitopolwa shaShana oya ndhindhilike iipotha yomaikuthomwenyo tayi indjipala sho taya lopotelwa iiningwanima yoludhi ndoka esiku kehe.

Omukuluntu gwopolisi moshitopolwa shaShana Naftal Lungameni Sackaria okwa ti nonando ka li nomwaalu gwothaathaa, aantu mboka yi ikutha omwenyo oyendji noonkondo.

Ta popi ta ti, omaimangeleko otaga indjipala unene moshitopolwa shawo, ihe otaga limbilike.

“Olundji oonakusa ohaya thigi ya nyola shoka she ya hingi sigo yi ikutha oomwenyo, ihe oonkundana dhoka kadhi shi nando oombwaanawa,” ta nyenyeta ngaaka.

Ta gwedha po kutya kehe oshiwike oshitopolwa shawo otashi lopotelwa omaso gomaikuthomwenyo.

Ta kumagidha oshigwana shi kale aluhe tashi kambadhala okukonga omakwatho oshowo omahungomwenyo peha lyokwiikutha oomwenyo.

“Eikuthomwenyo halyo ekandulepo lyuupyakadhi, ihe okweeta po uupyakadhi hawu thigilwa aakwanezimo nomalimbililo oshowo uudhigu, peha kwa li wu na okukandulwa po,” ta popi ngaaka.

Omuhungimwenyo mendiki lyuuministeli wuukashikekookantu Evelina Amakali, okwa li a kutha ko kuuyelele kombinga yaashoka a koneke kuye mwene, ongomuhungimwenyo, hashi etitha  eyikuthomwenyo.

“Onkalo yomuntu e na omaupyakadhi gontumba taga vulu oku mu etela oombepo dhokwiikutha omwenyo ondhigu, nonando poompito odhindji, oto vulu oku shi mona okupitila momaihumbato ge sho taga lunduluka,” ta fatulula ngaaka.

Ta ti, omaihumbato gomuntu oga pumbwa okukotokelwa aluhe, opo a mone omayakulo kuyele, okuyanda maupyakandhi gokwiikutha omwenyo.

Ta popi ta ti, shoka ohashi etwa uuna omuntu a nyengwa okumona eyambidhidho lyokukandula po uupyakadhi a taalela.

“Omaupyakadhi oge li pamaludhi, ngoka omuntu ha vulu okuhuulila muunyengwi ngaashi oondjodhi oombwinayi, omaso gahoolike yawo, oombedhi, oombepo oondhigu, omauwehame gethimbo ele, etekepo lyohole pokati kookuume nosho tuu,” ta popi ngaaka.

Amakali okwa ti, okwa ndhindhilike kutya ohashi kala oshidhigu unene uuna nakusa a thiga a shanga shoka sha eta uupyakadhi, opo a i ikuthe omwenyo, shi vulithe ngoka inaa thiga po sha.

“Ohashi kala oshidhigu okuhekeleka aakwanezimo sha ikolelela kwaashoka sha shangwa nenge sha etitha uupyakadhi, shi vulithe kape na uuyelele washa, oshoka ihapu kala ombedhi nonando kape na we shoka tashi vulu okuningwa po,” ta fatulula ngaaka.

Amakali ota kumagidha oshigwana aluhe shi kale tashi kongo omakwatho kaahungimwenyo, kaayitaali oshowo kwaamboka ye na ontseyo yomakwatho goludhi ndoka uuna ya iyadha ya taalela omaupyakadhi.

Christine Mattie ngoka a ilongele ehungomwenyo koshiputudhilo shopombanda nongaashiingeyi omulongi paithano okwa ti, okwa koneke kutya, kape na oshikukutu shaa hulu.

“Omaupyakandhi ogendji ga hingi oshigwana shetu sigo omomaso okwa li taga vulu okukandulwa po, ihe ontseyo oyo ashike kaaya li po,” ta popi ngaaka.

Ta ti, sigo onena ina tsakaneka etompelo lya gandjwa kwaamboka yi ikutha oomwenyo, ihe kakwa li tali vulu okukandulwa po.

“Shoka tu na okutseya aluhe ooshoka kutya ngoka ha kongo oha mono, nongele to konkola oto egululwa, nuuna to pula oto pewa. Ngele owa kongo ekwatho ihe ino mona eyakulo, ino sholola, ihe tsikile sigo wa mono ekwatho,” Mattie ta ti ngaaka.

Omumvo gwa zi ko uuministeli wuuhaku nonkalonawa owa li wa pititha kutya aantu ye vule 520  000 moshilongo oye na uunkundi wopamandhilandhilo.

-vkaapana@nepc.com.na