Minista gwomayambulepo goondoolopa niitopolwa yokuushayi Erastus Uutoni okwa kumagidha omalelo goondoolopa ga kuthe oshi holelwa oshiwanawa kelelo lyondoolopa yaShakati.
“Omalelo goondoolopa oshowo gokuushayi ogendji oga sa, nongele owa piti osheelo shoombelewa dhago, ito mono nando aantu taya inyenge. Thikameni mu longe mwi itula mo,” ta kumagidha ngaaka.
Ta ti, omalelo ngoka ga sa kage na esiku ga ye komeho, go kage na esiku ga ete ehumokomeho momidhingoloko dhawo.
“Omwa ndhindhilike ngaa kutya mpoka pe na ehumokomeho, ohapu kala natango oompito dhiilonga?” ta pula ngaaka.
Ta gwedha po ta ti, okwa hala omalelo goondoolopa ga longe ga itula mo, ga kuthe oshiholelwa kelelo lyondoolopa yaShakati.
“Oyendji ya kuutumba mpaka oya hala omalukalwa gawo yene, oye na aanona taya indjipala, onkene mpoka ye li nena itaya ka gwana po we, oye na okukala ye na omagumbo gawo naakwanezimo yawo,” ta fatulula ngaaka.
Uutoni okwa ti, okwa hala oku ithanwa iikando oyindji koondoolopa dhilwe, a ka patulule omagumbo pambelewa nenge a ka gandje oopolota kaantu ya tunge omagumbo gawo.
Laimi Shithigona ogumwe gwomwaamboka ya ningile omayindilo goopolota melelo lyondoolopa lyaShakati, ihe mongaashingeyi oku na egumbo lye kEhenye.
“Shapo ngoka kee na egumbo mOshakati ina hala, omahala mOshakati kage na ondjindikila okumona. Thikama nena wu ka ninge eyindilo, ehala lyoye mwene oto li mono,” ta tanga ngaaka.
Shithigona ta ti, kashi na kutya owu na iiyemo ya kola nenge inaayi kola nenge kuu na sha nando.
Mayola gondoolopa yaShakati Leonard Hango okwa kumagidha oshigwana shi ninge omayindilo.
“Omahala otu ga na lela ga gwana, no ta tu ke ga gandja ku kehe ngoka a ninga eyindilo, kape na nando ogumwe ta tu hupithwa ko, kashi shi mOshakati,” ta popi ngaaka.
Ta ti, elelo lyondoolopa yaShakati olya kutha ko oongaku, nolya hala okulongela oshigwana shawo omawunawa ngaashi naanaa tashi pula.
Iiwike iyali ya piti Uutoni okwa li a patulula omagumbo ge vule 190 noopolota dhi li 100 kOnawa omanga oshiwike sha zi ko a gandja oopolota dha pita 500 dhi li metifa lyokutungwa omagumbo kOmpumbu mOshakati.
- vkaapanda@nepc.com.na